काठमाडौं । स्वास्थ्य तथा जनसंख्या मन्त्रालयले बुधबारको कोभिड–१९ अपडेटमा काठमाडौं उपत्यकाबाट १३८ जना कोरोना संक्रमित थपिएको पुष्टि गरेको छ । मन्त्रालयका प्रवक्ता डा. जागेश्वर गौतमले मुलुकभरका विभिन्न प्रयोगशालामा १० हजार ४८१ वटा नमूनाको पीसीआर परीक्षण गरिएकोमा उपत्यकामा मात्रै १३८ जना थपिएको बताए । तीमध्ये काठमाडौंका १०७, ललितपुरका २३ र भक्तपुरका ८ जना छन् । यस तथ्यांक अनुसार उपत्यकामा कोरोना संक्रमण दर तीव्ररुपमा फैलिएको प्रष्ट हुन्छ ।

मन्त्रालयका अनुसार बुधबारमात्र उपत्यकाका सहित मुलुकभरबाट ४८४ जना कोरोना संक्रमित थपिएका छन् । यीसँग नेपालमा कोरोना संक्रमितको संख्या २४ हजार ४ सय ३२ पुगेको छ । कुल संक्रमितमध्ये हालसम्म १६ हजार ७ सय २८ जना निको भएका छन् । आजमात्र ६४ जना कोरोना मुक्त भएका छन् । त्यस्तै बाँकी ७ हजार ६ सय १३ जनाको आइसोलेसनमा उपचार भइराखेको छ ।

अहिलेसम्म कोरोना संक्रमणका कारण ९१ जनाको मृत्यु भएको मन्त्रालयले पुष्टि गरेको छ । त्यसैगरी हालसम्म देशभरिका क्वारन्टीनमा १४ हजार ८४८ व्यक्ति भएको मन्त्रालयले जनाएको छ ।