पर्सा । शनिबार बिहान पर्साको बहुदरमाई नगरपालिकाका मेयर नितेन्द्र साहसहित थप ५५ जनामा कोरोना संक्रमण पुष्टि भएको छ । नारायणी अस्पतालको प्रयोगशालाको रिपोर्टमा पर्सामा ५५ जनामा कोरोना संक्रमण पुष्टि भएको बताइएको छ । संक्रमित हुनेमा स्वास्थ्यकर्मी र सुरक्षाकर्मी पनि छन् । तीमध्ये बाराका ३ र सर्लाहीका १ जना छन् ।

नारायणी अस्पतालका मेडिकल सुपरिडेन्टेन्ट मदन उपाध्यायका अनुसार संक्रमित हुनेहरुमा ४७ जना पुरूष र ८ जना महिला रहेका छन् । उनले संक्रमितमध्ये १० जनामा ज्वरो र खोकीको लक्षण देखिएको बताए ।

यीसँग पर्सामा मात्र संक्रमितको संख्या ९४५ पुगेको छ । कोरोना संक्रमणका कारण पर्सामा अहिलेसम्म २० जनाको मृत्यु भइसकेको छ । साउनमा मात्रै १६ जनाको मृत्यु भएको छ ।