काठमाडौं । काठमाडौं उपत्यकामा शुक्रबार थप १०६ जना कोरोना संक्रमित थपिएका छन् । स्वास्थ्य तथा जनसंख्या मन्त्रालयको शुक्रबारको कोरोना अपडेटमा मन्त्रालयका प्रवक्ता डा. जागेश्वर गौतमले उपत्यकाका १०६ जनामा कोरोना संक्रमण देखिएको पुष्टि गरेका हुन् । उनका अनुसार उपत्यकाका काठमाडौंमा ९२ जना, ललितपुरका १० र भक्तपुरका ४ जना रहेका छन् । बिहीबारमात्र काठमाडौं उपत्यकामा ८७ जनामा संक्रमण पुष्टि भएको थियो ।

मन्त्रालयका अनुसार शुक्रबार मुलुकभरबाट ४६४ जनामा संक्रमण पुष्टि भएको छ । यीसँगै नेपालमा कोरोना संक्रमितको संख्या २२ हजार २ सय १४ पुगेको छ । त्यसैगरी हालसम्म कोरोना जित्नेको संख्या अहिलेसम्म १५ हजार ८ सय १४ पुगेको छ । पछिल्लो २४ घण्टामा विभिन्न कोरोना अस्पतालबाट थप ४२५ जना डिस्चार्ज भएका छन् ।

सरकारी तथ्यांक अनुसार हालसम्म कोरोनाकै कारण मृत्यु हुनेको संख्या ७० पुगेको छ ।