काठमाडौं । पछिल्लो २४ घण्टामा मुलुकभरबाट थप ४ सय ६४ जना कोरोना संक्रमित थपिएका छन् । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले विभिन्न प्रयोगशालामा गरिएको परीक्षणका क्रममा उक्त संख्यामा नयाँ संक्रमित थपिएको पुष्टि गरेका थिए । यीसँगै नेपालमा कोरोना संक्रमितको कुल संख्या २२ हजार २ सय १४ पुगेको छ । सो अवधिमा ७ हजार ९२६ वटा नमूनाको पीसीआर परीक्षण भएको प्रवक्ता गौतमले बताए ।

आज थपिने नयाँ संक्रमितमा पर्सा जिल्लाकामात्र १३८ जना छन् भने काठमाडौं उपत्यकाका १०६ जना रहेका छन् ।

त्यसैगरी सोही अवधिमा थप ४ सय २५ जना कोरोनामुक्त भई डिस्चार्ज भएका छन् । यीसँगै नेपालमा हालसम्म १५ हजार ८ सय १४ जना कोरोनामुक्त भइ घर फर्किएको प्रवक्ता गौतमले जानकारी दिएका छन् ।

मन्त्रालयका अनुसार अहिले सक्रिय संक्रमितको संख्या ६ हजार ३३० रहेको छ । त्यस्तै देशभरिका विभिन्न क्वारन्टीनमा रहनेको संख्या १० हजार २०५ पुगेको छ ।

हालसम्म कोरोनाका कारण ज्यान गुमाउनेको संख्या ७० पुगेको मन्त्रालयको तथ्यांकमा उल्लेख गरिएको छ ।