काठमाडौं । पछिल्लो २४ घण्टामा थप ३६० जना कोरोना संक्रमित थपिएको स्वास्थ्य तथा जनसंख्या मन्त्रालयले बताएको छ । मन्त्रालयका प्रवक्ता डा. जागेश्वर गौतम सो संख्या बारे पुष्टि गरेका हुन् । मन्त्रालयको नियमित कोभिड–१९ ब्रिफिङमा उनले थपिएका नयाँसहित हालसम्म नेपालमा कोरोना संक्रमितको कुल संख्या २१ हजार ७५० पुगेको बताएका छन् । सो अवधिमा मुलुकभरका विभिन्न प्रयोगशाला ६ हजार ६२२ जनाको पिसिआर परीक्षण गरिएको प्रवक्ता डा. गौतमले बताएका थिए ।

त्यसैगरी सोही अवधिमा विभिन्न कोरोना उपचार अस्पतालबाट थप २३३ जना कोरोनामुक्त भई डिस्चार्ज भएका छन् । मन्त्रालयको तथ्यांक अनुसार हालसम्म कोरोना जितेर डिस्चार्ज हुनेको संख्या १५ हजार ३८९ पुगेको छ । हाल सक्रिय संक्रमितको संख्या ६ हजार २९६ रहेको छ । नेपालमा कोरोनाले मृत्यु हुनेको संख्या ६५ पुगेको मन्त्रालयले बताएको छ ।

मन्त्रालयका अनुसार अहिले देशभरि विभिन्न स्थानमा क्वारन्टीनमा बस्नेको संख्या ९ हजार ४७० पुगेको छ । हालसम्म ४ लाख १९ हजार बढीको पिसिआर परीक्षण भएको छ ।