काठमाडौं । काठमाडौं उपत्यकामा बुधबार थप ६२ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले बताएको छ । नयाँ थपिनेमा काठमाडौंका ५७ र ललितपुरका ५ जना भएको मन्त्रालयका प्रवक्ता डा. जागेश्वर गौतमले बताएका हुन् । मंगलबार पनि उपत्यकामा ६२ जनामा संक्रमण पुष्टि भएको थियो ।

प्रवक्ता गौतमका अनुसार मुलुकभरबाट आज ३८१ जना कोरोना संक्रमित थपिएका छन् । यीसँगै नेपालमा कोरोना संक्रमितको कुल संख्या २१ हजार ३९० पुगेको छ । त्यस्तै अहिलेसम्म कुल संक्रमितमध्ये १५ हजार १५६ निको भएर घर फर्किएका छन् । बुधबारमात्र १३० जना डिस्चार्ज भएका छन् । उनका अनुसार अहिले क्वारेन्टाइनमा ९ हजार ९२५ जना रहेका छन् ।

मन्त्रालयका अनुसार पछिल्लो २४ घण्टामा देशभरका विभिन्न प्रयोगशालामा ६ हजार ३ सय ५९ वटा नमूनाको पिसिआर परीक्षण भएको थियो । हालसम्म ४ लाख १२ हजार बढीको पिसिआर परीक्षण भएको छ ।

हालसम्म कोरोनाबाट ६० जनाको मृत्यु भएको सरकारी तथ्यांकमा उल्लेख गरिएको छ ।