काठमाडौं । पछिल्लो २४ घण्टामा विभिन्न जिल्लामा थप १०० जना कोरोना संक्रमित थपिएका छन् । स्वास्थ्य तथा जनसंख्या मन्त्रालयको नियमित कोभिड–१९ अपडेटमा प्रवक्ता डा. जागेश्वर गौतमले मुलुकभरका २७ प्रयोगशालामा ३ हजार ७७९ वटा नमूनाको परीक्षण हुँदा १०० जना संक्रमित थपिएको पुष्टि गरेका हुन् । थपिएको संख्यासँगै नेपालमा कोरोना संक्रमितको संख्या १८ हजार ९४ पुगेको छ ।

प्रवक्ता गौतमका अनुसार कोरोना संक्रमणबाट एक चिनियाँ नागरिकसहित दुईको मृत्यु भएको छ । मृत्यु हुने चिनियाँ नागरिकमा ४९ वर्षीया एक महिला रहेकी छन् । उनको काठमाडौंको ग्याण्डी अस्पतालमा उपचारका क्रममा साउन ७ गते मृत्यु भएको हो ।

त्यसैगरी मृतकमध्ये अर्का एक धनुषाका ६० वर्षीय पुरुष रहेका छन् । उनको विपी स्वास्थ्य प्रतिष्ठानमा उपचारको क्रममा साउन ६ गते मृत्यु भएको हो । मत्युपश्चात् गरिएको परीक्षणमा उनमा कोरोना संक्रमण पुष्टि भएको प्रवक्ता गौतमले बताए । यीसँगै नेपालमा हालसम्म कोरोनाबाट मृत्यु हुनेको संख्या ४२ पुगेको मन्त्रालयको तथ्यांकमा उल्लेख गरिएको छ ।

मन्त्रालयका अनुसार सोही अवधिमा थप २०७ जना कोरोना जितेर निको भएका छन् । यीसँगै निको हुनेको कुल संख्या १२ हजार ८४२ पुगेको छ । अहिलेसम्म ७०.१ प्रतिशत निको भएका छन् । हाल विभिन्न अस्पतालमा ५ हजार ३६८ सक्रिय संक्रमितको आइसोलेसनमा उपचार भइरहेको छ । क्वारेन्टाइनमा रहनेको संख्या २० हजार ८४२ रहेको छ ।

मुलुकभरबाट अहिलेसम्म ३ लाख २७ हजार ६१४ वटा नमूनाको पीसीआर परीक्षण गरिसकिएको पनि मन्त्रालयले बताएको छ ।