काठमाडौं । पछिल्लो २४ घण्टामा मुलुकका विभिन्न जिल्लामा थप १०१ व्यक्तिमा कारोना संक्रमण पुष्टि भएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले बताएका छन् । मन्त्रालयको नियमित कोरोना पत्रकार सम्मेलनमा उक्त संख्यामा नयाँ संक्रमित थपिएसँगै देशभरि कोरोना पुष्टि भएका संक्रमितको कुल संख्या १७ हजार ४४५ पुगेको प्रवक्ता गौतमले जानकारी दिएका थिए ।

त्यसैगरी बिहीबार राति सप्तरीको राजविराज-६ का ७३ वर्षीय व्यापारी रामकृष्ण दासको कोरोनाका कारण मृत्यु भएको मन्त्रालयले पुष्टि गरेको छ । उनको धरानस्थित वीपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको हो । यीसँगै हालसम्म कोरोनाकै कारण ४० जनाको मृत्यु भएको छ ।

प्रवक्ता गौतमका अनुसार यही अवधिमा विभिन्न कोरोना उपचार केन्द्रबाट थप २८५ जना डिस्चार्ज भएका छन् । अहिलेसम्म कोरोना जितेर ११ हजार ५३४ व्यक्ति घर फर्किएका छन् । यो कुल संक्रमितको ६६ दशमलब १२ प्रतिशत हो ।

यसैगरी पछिल्लो चौबीस घण्टामा विभिन्न प्रयोगशालामा चार हजार ६८८ वटा नमूनाको परीक्षण गरिएको मन्त्रालयले जनाएको छ । अहिले संक्रमण पुष्टि भएकामध्ये पाँच हजार ८७१ व्यक्तिको आइसोलेशनमा उपचार भइरहेको छ । उनीहरु सक्रिय संक्रमित हुन् ।

मन्त्रालयका अनुसार शुक्रबारसम्म पीसीआर विधिबाट २ लाख ९८ हजार ८२९ वटा नमूनाको परीक्षण गरिएका छन् । अहिले क्वारेन्टाइनमा २२ हजार ७५६ जना रहेका छन् ।