काठमाडौं । सोमबार थप १८० जनामा कोरोना संक्रमण पुष्टि भएसँगै नेपालमा संक्रमितको संख्या १५ हजार ९६४ पुगेको स्वास्थ्य तथा जनसंख्या मन्त्रालयले जानकारी दिएको छ । संक्रमितमध्ये उपत्यकाका काठमाडौंमा २४, ललितपुरमा २० र भक्तपुरमा १० जना रहेको मन्त्रालयको नियमित मिडिया ब्रिफिङमा प्रवक्ता डा. जागेश्वर गौतमले जानकारी दिएका छन् ।

प्रवक्ता डा. गौतमका अनुसार विभिन्न कोरोना उपचार केन्द्रबाट पछिल्लो २४ घण्टामा थप २६४ जना कोरोना जितेर डिस्चार्ज भएका छन् । यीसँगै हालसम्म मुलुकभर कुल ६ हजार ८११ जना कोरोनामुक्त भएका छन् । त्यस्तै असार २१ गते बागलुङको ढोरपाटन नगरपालिकाका २९ वर्षीय एक पुरुषको कोरोनाकै कारण मृत्यु भएको छ । कुल संक्रमितमध्ये हालसम्म कोरोनाका कारण मृत्यु हुनेको संख्या ३५ पुगेको छ ।

मन्त्रालयका अनुसार पछिल्लो २४ घण्टामा विभिन्न प्रयोगशालामा ४ हजार ७२१ नमुनाको पीसीआर परीक्षण गरिएको थियो । अहिलेसम्म २ लाख ५५ हजारभन्दा बढीको पिसिआर विधिबाट परीक्षण भएको । त्यसैगरी उपचारका क्रममा आइसोलेशनमा भएका संक्रमितको संख्या ९ हजार ११८ रहेको छ । अहिलेसम्म २९ हजार २१५ जना क्वारेन्टाइनमा रहेका छन् । हाल ५१९ जना रेड जोनमा रहेको मन्त्रालयले बताएको छ ।