काठमाडौं । स्वास्थ्य तथा जनसंख्या मन्त्रालयको नियमित कोरोना अपडेटमा प्रवक्ता डा. जागेश्वर गौतमले थप ४६३ जनामा कोरोना संक्रमण पुष्टि भएको जानकारी दिएका छन् । उनका अनुसार पुरुष ३५८ र महिला १०५ जना रहेका छन् । यीसँगै नेपालमा कोरोना संक्रमितको संख्या १२ हजार ७७२ पुगेको छ ।

कुल संक्रमितमध्ये पुरुष ११ हजार २९८ र महिला १ हजार ४७४ जना छन् । यीमध्ये हालसम्म नेपालमा कोरोनाकै २८ जनाको मृत्यु भइसकेको छ ।

मन्त्रालयका अनुसार पछिल्लो २४ घण्टामा थप १७९ डिस्चार्ज भएका छन् । जसमा १३ महिलासहित १७९ जना रहेका छन् । योसँगै उपचार पछि निको हुने संख्या ३ हजार १३ पुगेको छ ।

प्रवक्ता डा. गौतमका अनुसार पछिल्लो २४ घण्टामा ४ हजार ९६२ वटा नमुनाको पीसीआर विधिबाट परीक्षण भएको छ । हालसम्म मुलुकभर पीसीआर विधिबाट २ लाख १५ हजार ८३८ जना र आरडीटी विधिबाट २ लाख ९६ हजार ७६६ जनाको नमुना परीक्षण गरिएको छ ।

अहिले आइसोलेसन ९ हजार ७३१ जनाको उपचार भइरहेको छ भने क्वारेन्टिनमा ६१ हजार ७३१ जना बसिरहेको मन्त्रालयले जनाएको छ ।