काठमाडौं । पछिल्लो २४ घण्टामा थप ५५४ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित मिडिया ब्रिफिङमा मन्त्रालयका प्रवक्ता डा. जागेश्वर गौतमले उक्त संख्या थपिएको पुष्टि गरेका हुन् । शनिबार थपिएका नयाँ संक्रमितमा पुरुष ४३४ र महिला १२० जना रहेका छन् । यीसँगै नेपालमा कोरोनाबाट संक्रमित हुनेको कुल संख्या १२ हजार तीन सय ९ पुगेको छ । प्रवक्ता गौतमका अनुसार शनिबार रसुवामासमेत कोरोना संक्रमण पुष्टि भएसँगै अब मुलुकका ७७ जिल्लामै कोरोना फैलिएको छ ।

त्यसैगरी कोरोनाबाट थप एकको मृत्यु भएको मन्त्रालयले पुष्टि गरेको छ । मृत्यु हुनेमा भरतपुर अस्पतालमा उपचाररत कैलालीको गोदावरी नगरपालिका ७ का ५० वर्षीय एक पुरुष रहेका छन् । उनी फोक्सोको क्यान्सरको बिरामी रहेको बताइएको छ । यीसँगै नेपालमा कोरोना भाइरस संक्रमणबाट मृत्यु हुनेको संख्या २८ पुगेको छ ।

मन्त्रालयका अनुसार पछिल्लो २४ घण्टामा विभिन्न कोरोना उपचार केन्द्रबाट उपचारपछि थप १३६ जना डिस्चार्ज भएका भएका छन् । जसमा पुरुष ११८ र महिला १८ जना रहेका छन् । हालसम्म कोरोना जित्नेको कुल संख्या २८ सय ४३ पुगेको छ ।

उक्त मिडिया ब्रिफिङमा प्रवक्ता डा. गौतमले विगत २४ घण्टामा ४ हजार ६०६ वटा नमुनाको पीसीआर विधिबाट परीक्षण गरिएको बताए । अहिलेसम्म कुल २ लाख १० हजार ८७६ नमुनाको पीसीआर विधिबाट परीक्षण भएको उनले बताएका छन् ।