काठमाडौँ । पछिल्लो २४ घण्टामा कोरोना भाइरसका थप ४२५ जना नयाँ संक्रमित थपिएका छन् । स्वास्थ्य तथा जनसंख्या मन्त्रालयको नियमित कोरोना अपडेटमा मन्त्रालयका प्रवक्ता डा. जागेश्वर गौतमले विभिन्न प्रयोगशालामा गरिएको परीक्षणका क्रममा थप ४२५ जनामा संक्रमण पुष्टि भएको जानकारी दिएका हुन् । त्यसमा पुरुष ३७५ र महिला ५० जना रहेको उनले बताए । योसँगै नेपालमा कुल संक्रमित संख्या ५ हजार ७६० पुगेको छ ।

उनका अनुसार कोरोनाकै कारण थप एकको मृत्यु भएको छ । मृत्यु हुनेमा धूर्कोट गाउँपालिका–४ जैशीथोक, गुल्मीका ३६ वर्षका एक पुरुषमा रहेका छन् । उनी भारतबाट नेपाल आएर क्वारेन्टाइनमा बसेका थिए । उनको मृत्युसँगै नेपालमा कोरोना भाइरसका कारण मृत्यु हुनेको संख्या १९ पुगेको छ ।

त्यसैगरी पछिल्लो २४ घण्टामा विभिन्न कोरोना उपचार केन्द्रबाट थप ६१ जना कोरोना जितेर निको भएका छन् । योसँगै कोरोना जित्नेको संख्या ९७४ पुगेको मन्त्रालयले बताएको छ ।

मन्त्रालयका अनुसार हालसम्म पीसीआरबाट १ लाख ३३ हजार ३७७ जनाको नमुना परीक्षण भएको छ । पछिल्लो २४ घण्टामा पीसीआर विधिबाट ६ हजार ०८९ जनाको नमुना परीक्षण भएको छ । हाल देशभर आइसोलेसनमा ४ हजार ७६८ जनाको उपचार भइरहेको छ भने १ लाख ४३ हजार ६४१ जना क्वारेन्टिनमा रहेका छन् ।