काठमाडौँ । नेपालमा शुक्रबार थप ४४८ जनामा कोरोना पुष्टि भएको छ । यो अहिलेसम्मकै धेरै संख्या हो ।

स्वास्थ्य तथा जनसंख्या मन्त्रालयको नियमित कोरोना अपडेटमा मन्त्रालयका प्रवक्ता डा. जागेश्वर गौतमले विभिन्न प्रयोगशालामा गरिएको परीक्षणमा ४४८ जना नयाँ संक्रमित थपिएको जानकारी दिएका हुन् । संक्रमितमा ४ सय २४ पुरुष र २४ महिला छन् । यीसँगै नेपालमा कोरोना संक्रमितको संख्या ५ हजार ६२ पुगेको छ। तीमध्ये ८७७ जना निको भएका र थप एक जनाको मृत्यु भएको प्रवक्ता गौतमले बताए ।

उनका अनुसार मृत्यु हुनेमा अर्घाखाँचीको मालारानी–४ को सार्वजनकि आधारभूत विद्यालयमा बनाइएको क्वारेन्टाइनमा बसेका ५७ वर्षीय पुरुष रहेका छन् ।

विगत २४ घण्टामा ५ हजार ९२५ वटा नमुनाको पीसीआर विधिबाट परीक्षण गरिएको मन्त्रालयले बताएको छ । हालसम्म पीसीआर विधिबाट १ लाख २१ हजार ८६२ जनाको परीक्षण भइसकेको छ ।

अहिले देशभरि १ लाख ५८ हजारभन्दा बढी व्यक्ति क्वारन्टीनमा रहेको प्रवक्ता गौतमले जानकारी दिए ।