काठमाडौँ । नेपालमा कोरोना संक्रमितको कुल संख्या ४ हजार ३ सय ६४ पुगेको छ । स्वास्थ्य तथा जनसंख्या मन्त्रालयको नियमित मिडिया ब्रिफिङ मन्त्रालयका प्रवक्ता डा. जागेश्वर गौतमले बुधबार थप २७९ जनामा कोरोना संक्रमण पुष्टि भएको जानकारी दिएका हुन् । जसमा पुरुष २५७ र महिला २२ जना रहेका छन् ।

मन्त्रालयका अनुसार पछिल्लो २४ घण्टामा ९० जना कोरोना जितेर डिस्चार्ज भएका छन् । यसरी हालसम्म कोरोना जित्नेमा ६७४ जना पुगेका छन् । १५ जनाको मृत्यु भइसकेको छ ।

प्रवक्ता गौतमका अनुसार पछिल्लो २४ घण्टामा ४ हजार ४ सय १४ वटा नमुनाको पीसीआर विधिबाट परीक्षण गरिएको थियो । देशभरबाट अहिलेसम्म पिसिआरबाट एक लाख १० हजार ७ सय ४४ र आरडीटी विधिबाट एक लाख ७२ हजार ८ सय ८० को नमुना परीक्षण गरिएको छ ।

अहिले आइसोलेसनमा ३ हजार ६७५ को उपचार भइरहेको छ भने क्वारेन्टिनमा एक लाख ७२ हजार २६६ रहेको मन्त्रालयले बताएको छ ।