काठमाडौँ । नेपालमा थप २ सय ७८ जनामा कोरोना भाइरस संक्रमण देखिएको छ । स्वास्थ्य तथा जनसंख्या मन्त्रालयको नियमित मिडिया ब्रिफिङमा मन्त्रालयका प्रवक्ता डा. विकास देवकोटाले पछिल्लो २४ घण्टामा विभिन्न प्रयोगशालामा गरिएको परीक्षणमा २ सय ७८ जनाको रिपोर्ट पोजिटिभ आएसँगै संक्रमितको संख्या २ हजार ९ सय १२ पुगेको जानकारी दिएका छन् । नयाँ थपिएका संक्रमितमा २ सय ६७ पुरुष र ११ महिला रहेका छन् । मन्त्रालयका अनुसार हालसम्म ३ सय ३३ जना भने निको भइसकेका छन् ।

त्यसैगरी कोरोना भाइरसको संक्रमणबाट नेपालमा अर्का एक व्यक्तिको मृत्यु भएको छ । यीसँगै मृत्यु हुनेको संख्या ११ पुगेको छ । स्वास्थ्य तथा जनसंख्या मन्त्रालयका अनुसार मृत्यु हुने ११ औं व्यक्ति सुर्खेत पञ्चपुरी नगरपालिका वडा नम्बर १ का युवा छन् । उनको बिहिवार बिहान मृत्यु भएको र परीक्षणमा कोरोना पोजिटिभ देखिएको मन्त्रालयले जनाएको छ ।

मन्त्रालयले हालसम्म पीसीआरबाट ८८ हजार तीन सय ६६ र आरडीटी विधिबाट एक लाख ३२ हजार ९ सय ६६ जनाको नमुना परीक्षण गरिएको बताएको छ । मन्त्रालयका अनुसार विगत २४ घण्टामा ४ हजार २ सय ३२ वटा नमुनाको पीसीआर विधिबाट परीक्षण गरिएको छ भने शुक्रबारसम्म देशभरि १ लाख ६६ हजार ७ सय ६५ जना क्वारेन्टिनमा रहेका छन् ।