काठमाडौँ । नेपालमा आइतबार थप १६६ जनामा कोरोनाभाइरस संक्रमण पुष्टि भएको छ । योसँगै कोरोना संक्रमितको कुल संख्या १ हजार ५६७ पुगेको छ ।

स्वास्थ्य तथा जनसंख्या मन्त्रालयको नियमित मिडिया ब्रिफिङमा मन्त्रालयका प्रवक्ता डा. विकास देवकोटाले देशभरका विभिन्न प्रयोगशालामा २४ घण्टायता गरिएको परीक्षणका क्रममा उक्त संख्या थपिएको बताएका हुन् ।

प्रवक्ता डा. देवकोटाका अनुसार रौतहटमा २९, सल्यानमा २५, धनुषामा २१, कालिकोटमा १८, दैलेखमा १८, सप्तरीमा १२, सर्लाहीमा १०, बाँकेमा ८, कपिलवस्तुमा ५, पर्सामा ५, झापामा ४, बाजुरामा ३, कैलालीमा ३, स्याङ्जामा २, मोरङमा १, तनहुँमा १ र सुर्खेतमा १ जना नयाँ कोरोना संक्रमित थपिएका हुन् ।

हालसम्म संक्रमितमध्ये २२० जना निको भएर घर फर्किसकेका छन् । शनिवार दैलेखका एक पुरुष र आइतवार बिहान बाजुरामा एक बालिकाको कोरोना संक्रमणका कारणले मृत्यु भएको पुष्टि भएपछि मृतकको संख्या ८ जना पुगेको मन्त्रालयले जनाएको छ ।

प्रवत्ता देवकोटाका अनुसार हालसम्म पीसीआर विधिबाट ६९ हजार ५ सय ८२ र आरडीटी विधिबाट एक लाख ११ हजार १ सय ९ जनाको नमुना परीक्षण गरिएको छ । पछिल्लो २४ घण्टामा पीसीआर विधिबाट २ हजार ८५३ वटा परीक्षण गरिएको डा. देवकोटाले बताए ।

मन्त्रालयका अनुसार देशभरि अहिले १ लाख १९ हजार १९२ व्यक्ति क्वारेन्टाइनमा र १ हजार ३४९ जना आइसोलेशनमा रहेका छन् ।