काठमाडौँ । नेपालमा बिहीबार बिहान थप १७ जनामा कोरोना भाइरस सङ्क्रमण पुष्टि भएको छ । योसँगै कोभिड–१९ बाट संक्रमित हुनेको कुल संख्या ४ सय ४४ पुगेको हो ।

स्वास्थ्य तथा जनसंख्या मन्त्रालयका सहप्रवक्ता समिरकुमार अधिकारीका अनुसार वि.पी. कोइराला स्वास्थ्य विज्ञान प्रतिष्ठान, धरान र प्रादेशिक जनस्वास्थ्य प्रयोगशाला, विराटनगरमा गरिएको परीक्षणमा १७ जना नयाँ संक्रमित थपिएका हुन् ।

नयाँ सङ्क्रमण पुष्टि भएकामा १५ जना झापाको कचनकवल गाउँपालिकाका वडा नम्बर ३, ६ र ८ का पुरुषहरू रहेका छन् । संक्रमित सबै १८ वर्षदेखि ४६ वर्ष उमेर समूह हुन् ।

त्यसैगरी धनकुटा निवासी ३४ वर्षीय पुरुष र सुनसरी धरान उप-महानगरपालिका निवासी ५१ वर्षीया महिलामा कोरोना संक्रमण पुष्टि भएको हो ।

मन्त्रालयले उनीहरु सबैको स्वास्थ्य अवस्था सामान्य रहेको र स्वास्थ्यकर्मीको सम्पर्कमा रहेको जनाएको छ ।