ललितपुर । महालक्ष्मी नगरपालिकाले दोस्रोपटक कोरोना भाइरस परीक्षण गर्ने भएको छ । विदेशबाट आई लुकेर बसेका नगरवासीको पहिलोपटकको कोरोना परीक्षणमा छुटेकोको दोस्रोपटक परीक्षण गर्न लागेको हो ।

परीक्षणका लागि बुधबारसम्म नाम टिपाउने नगरवासीको सङ्ख्या ८२ पुगिसकेका नगरपालिका प्रमुख रामेश्वर क्षेष्ठले जानकारी दिए । उनले भने, “एक सय बढी नगरवासीले दोस्रोपटक कोरोना परीक्षण गर्ने स्थिति देखिएको छ ।” यसपटक जनप्रतिनिधि, स्वयंसेवक र स्वास्थ्यकर्मीले विदेशबाट आई घरमा बसेका सबैलाई खोजी–खोजी कोरोना परीक्षण गर्न बोलाएको श्रेष्ठले बताए ।

नगरपालिकामा जनघनत्व ठूलो भएकाले यी व्यक्ति पहिलो चरणमा छुटेका नगरपालिका स्वास्थ्य शाखा प्रमुख गोविन्दप्रसाद श्रेष्ठले बताए ।

गोदावरी नगरपालिकाले पनि दोस्रोपटक र्‍यापिड परीक्षण गर्ने भएको छ । पहिलोपटक परीक्षणमा उपस्थित नभएका नगरवासीलाई ध्यानमा राखी दोस्रोपटक परीक्षण गर्न लागिएको नगरपालिका प्रमुख गजेन्द्र महर्जनले बताए ।

यता ललितपुर महानगरपालिकाले यही वैशाख २ र ३ गते पहिलो चरणमा २५६ र वैशाख ९ गते दोस्रो चरणमा ८३ जनाको र्‍यापिड परीक्षण गरिसकेको छ । छिमेकी देशबाट कोही लुकेर महानगरपालिका प्रवेश गरेका छन् भने आवश्यकताअनुसार तेस्रोपटक पनि कोरोना परीक्षणका लागि कदम अघि बढाउन सकिने महानगरपालिका जनस्वास्थ्य शाखा प्रमुख सरिता महर्जनले बताए । दक्षिण ललितपुरका तीनवटै गाउँपालिकामा कोरोना परीक्षण सम्पन्न भइसकेको छ । वाग्मतीका २१ गाउँवासीले वैशाख ८ गते ¥यापिड डायग्नोष्टिक परीक्षण गराइसकेका गाउँपालिकाका अध्यक्ष वीरबहादुर लोप्चले बताए ।

कोञ्ज्योसोमले वैशाख ४ गते १२ जना विदेशबाट फर्किएका नागरिकको र्‍यापिड परीक्षण गरिसकेको गाउँपालिकाका स्वास्थ्य शाखा संयोजक नवलकिशोर महतोले बताए । महाँकालले वैशाख ४ गते १० जना विदेशबाट फर्किएका गाउँवासीको र्‍यापिड परीक्षण गरिसकेको गाउँपालिका स्वास्थ्य शाखा संयोजक ज्ञानेन्द्र चन्दले बताए ।