काठमाडौँ । नेपालमा हालसम्म कोरोना भाइरसबाट सङ्क्रमित हुनेको सङ्ख्या ४५ पुगेको छ । धरानस्थित विपी कोइराला स्वास्थ्य विज्ञान प्रतिष्ठानमा गरिएको नमुना परिक्षणमा आज थप तीनजनामा कोरोना सङ्क्रमण भेटिएको स्वास्थ्य मन्त्रालयको नियमति पत्रकार सम्मेलनमा मन्त्रालयका प्रवक्ता डा. विकास देवकोटाले बताए।

ती तीनजना सुरुमा उदयपुरमा सङ्क्रमित भेटिएका १२ जनाको टोलीसँगै रहेकाहरू भएको अनुमान गरिएको छ । आज पत्ता लागेका सङ्क्रमितहरू २४ वर्षीय, ६० वर्षीय र ७२ वर्षीय पुरुष रहेको बताइएको छ ।

स्वास्थ्य मन्त्रालयका अनुसार संक्रमित सबैको अवस्था सामान्य रहेको र अहिलेसम्म ७ जना उपचारपछि घर फर्किएका छन् भने ३५ जनाको विभिन्न अस्पतालमा उपचार भइरहेको छ ।

प्रवक्ता देवकोटाले मन्त्रालयमा आज आयोजित नियमित पत्रकार भेटघाटमा पछिल्लो २४ घण्टामा तीन हजार ७३६ नयाँ प्रयोगशाला परीक्षण भएको जानकारी दिएका हुन् । क्वारेन्टाइनमा रहने व्यक्तिको सङ्ख्या हालसम्म आठ हजार ५९५ रहेको छ भने आइसोलेसनमा रहने सम्भावित सङ्क्रमितको सङ्ख्या ९५ जना रहेको छ । हाल कोभिड १९ को रेड जोनमा पर्नेको सङ्ख्या २६९ पुगेको पनि बताएका छन् ।