बैतडी । कोरोना भाइरसको सम्भावित जोखिम रोकथाम गर्न ११ वटा एम्बुलेन्सलाई तयारी अवस्थामा राखिएको छ । स्थानीय तहका ८, जिल्ला अस्पतालको २ र शहिद दशरथचन्द स्मृती प्रतिष्ठानको १ एम्बुलेन्सलाई तयारी अवस्थामा राखिएको स्वास्थ्य कार्यालयले जानकारी दिएको छ । कोरोना भाइरसका सम्भावित बिरामीका बारेमा खबर पाउने बित्तिकै तत्कालै उद्धार गरेर अस्पताल लगिने व्यवस्था मिलाइएको छ ।

जिल्ला विपद् व्यवस्थापन समितिका अध्यक्ष तथा प्रमुख जिल्ला अधिकारी आनन्द पौडेलले सबै एम्बुलेन्सका चालकलाई आवश्यक सुरक्षा सामग्रीसमेत प्रदान गरिएको जानकारी दिएका छन् । जिल्ला अस्पतालका अनुसार एम्बुलेन्समा चालक र बिरामीबीच कुनै सम्पर्क नहुने गरेर सम्भावित कोरोना सङक्रमित मात्रै बोक्न तयारी अवस्थामा राखिएका छन् ।

त्यस्तै एम्बुलेन्स चालकलाई सुरक्षित सामग्री लगाउने तरिका र सो भाइरसका सम्भावित बिरामीसँंग गर्ने व्यवहारका बारेमा तालिमसमेत प्रदान गरिएको छ । अहिले जिल्लामा सो भाइरसका सम्भावित बिरामी भेटिएका छैनन् । भारत तथा अन्य मुलुकबाट जिल्ला फर्केकालाई यहाँका स्थानीय तहले क्वारेन्टाइमा राखी दैनिक स्वास्थ्य जाँच गर्न थालेका छन् ।