काठमाडौं ।

फौजदारी र अन्य अपराधका घटनामा अनुसन्धान गर्ने कानुनी निकाय छन् । तर पदीय मर्यादाले नसुहाउने गतिविधिबाट सांसदलाइ रोक्न खबरदारी पनि आवश्यक छ ।

संसदका प्रमुख ब्यक्ति सभामुख हुन् । उनी नैतिक आचारणको घेरामा परेका छन् । नैतिकताको बिषयमा प्रहरीले पक्राउ गरेर उनलाई अनुसन्धान गरेको छ । हुनत संसदमा आचारका बारे समिति बनाउनु पर्ने नियम छ । सांसदका आचरणबारे अनुगमन गर्न कानुनमै समिति गठनको व्यवस्था छ । तर संघीय संसद नियमावलीमा रहेको व्यवस्था अनुसार सांसद आचारसंहिता अनुगमन समिति गठन हुनै सकेको छैन ।

संसद सचिवालयमा कार्यरत महिलालाई बलात्कार प्रयासको आरोपमा पूर्वसभामुख कृष्णबहादुर महरा असोज १९ गतेदेखि प्रहरी हिरासतमा छन् ।

नेपाली कांग्रेसका सांसद मोहम्मद आफताव आलम विष्फोटका घाइतेलाइ इँटा भट्टामा जिउँदै जलाएको र राजनीतिक शक्तिको आडमा १२ वर्षदेखि त्यो घटना दबाएको आरोपमा असोज २६ देखि हिरासतमै छन् ।

राष्ट्रिय जनता पार्टीका सांसद प्रमोदकुमार साह असोज २७ गते जनकपुर विमानस्थलमा तोडफोड गरेको आरोपमा भोलिपल्ट पक्राउ परी चार दिन हिरासतमा बसे । सांसदहरू संसदीय समितिमै अमर्यादित रुपमा प्रस्तुत हुने गरेका उदाहरण झन धेरै छन् । जेठ ७ गते सार्वजनिक लेखा समितिको बैठकमा सांसद अमनलाल मोदीले विद्युत प्राधिकरणका कार्यकारी निर्देशक कुलमान घिसिङमाथि खनिएका थिए । सांसदहरू खराब आचरणको विवादमा एकपछि अर्को घटनामा मुछिए पनि यसको अनुगमन गर्ने संयन्त्र बनाउन भने संसदमा अनपेक्षित अरूचि रहेको पाइयो । संसद नियमावलीमा सांसदको आचरण अनुगमन गर्न सभामुखकै नेतृत्वमा समिति गठन गर्ने, सांसदहरूका आचरणमा उठेका प्रश्न र उजुरीको छानबिन गर्ने, आफै पनि जनप्रतिनिधिको अनुगमन गरी सचेत गराउन सक्ने व्यवस्था छ ।

तर पहिलो संविधानसभादेखि यो व्यवस्था गरिए पनि अहिलेसम्म समिति नै गठन गरिएको छैन ।
गलत आचरण नदेखाउन र सांसदहरु अनुशासनमा रहुन् भन्नका लागि उनीहरुको आचरण अनुगमन गर्न १३ सदस्यीय समिति गठनको व्यवस्था गरिएको हो । तर अहिलेसम्म आचरणलाई लिएर एक जना सांसदलाई पनि सचेत गराइएको छैन ।