काठमाडौं ।

नेपालीमूलका विदेशी नागरिकले अध्यागम कर्मचारीहरुमाथि पटक पटक अभद्र गर्ने गरेका छन् । पछिल्लो पटक गैरआवासीय नेपाली संघको सम्मेलनमा भाग लिन अस्ट्रेलियबाट आएका एक नेपालीमूलका नागरिकले आइतवार मात्रै विभागका कर्मचारीमाथि अभद्र व्यवहार र विमानस्थलको डेस्क तोडफोड गरेका छन् ।

यसअघि मदिरा पिएर लठ्ठ भएको अवस्थामा सिल्क एयर र विमानस्थलका कर्मचारी तथा सुरक्षाकर्मीलाई दुर्व्यवहार गरेपछि एनआरएनएका अध्यक्ष भवन भट्टलाई पनि प्रहरीले जहाज चढ्न लागेको अवस्थामा फर्काइदिएको थियो।

घटनापछि अध्यागमन कार्यालयले बिज्ञप्तिनै निकालेर पीडा पोखेको छ ।

नेपाली नागरिकता त्यागेका विदेशीले पटक पटक अराजक व्यवहार दोहोर्‍याएको उल्लेख गरिएको छ ।

आइतवार राति क्याथे ड्रागन एयरको जहाजमा अस्ट्रेलियाबाट आएका नेपालीमूलका रमेश थापाले अध्यागमन कार्यालय त्रिभुवन विमानस्थलका कर्मचारीमाथि अभद्र व्यवहार गरेपछि प्रहरीको हिरासतमा पुगेका थिए।

उनलाई प्रहरीले थप कारबाहीका लागि अध्यागमन विभाग कालिकास्थानमा बुझाएको छ। अस्ट्रेलियाको पीए ७१०२५६६ नम्बरको राहदानीबाहक थापालाई कर्मचारीले सम्झाउँदा पनि अटेर गरेको पौडेलले जनाएका छन्।

उनले कर्मचारीले काम गरिरहेको डेस्कको शिशासमेत फुटाइदिएपछि अध्यागमन कार्यालयले प्रहरी बोलाएर समातेको थियो। अध्यागमन कार्यालयले नेपालीमूलका विदेशी नागरिकबाट पटक पटक यस्ता घटना भइरहेको भन्दै फेरि नदोहोर्‍याउन सचेत गराएको छ।