काठमाडौं ।

प्राधिकरणको शुल्क भन्दा डेरावाल बाट उठाउने घरबेटी अव कार्वाहीमा पर्ने भएका छन् । पछिल्लो समय आफ्नो घर बहालमा लगाउने घरबेटीले भाडावालसँग चर्को दरमा विद्युत महसुल उठाउने गरेको पाइएको भन्दै नेपाल विद्युत प्राधिकरणले अब त्यस्तालाई कार्वाही गर्ने बताएको छ । तोकिएको भन्दा बढी दरमा भाडावालासँग महसुल नलिन प्राधिकरणका कार्यकारी प्रमुख कुलमान घिसिङले घरबेटीसँग आग्रह गरे ।

प्राधिकरणद्वारा आयोजित पत्रकार सम्मेलनमा घिसिङले ‘तोकिएको भन्दा बढी दरमा भाडा असुल्नु गैरकानूनी भएकाले प्राधिकरणसँग निश्चित दरमा किनेको बिजुली त्योभन्दा बढीमा बेचेर व्यापार नगर्न आग्रह गरे ।

उनले घर बहालमा बस्नेहरुलाई विजुलीको दररेटबारे जानकारी लिएर त्योभन्दा बढी नतिर्न आग्रह गरे । प्राधिकरणले खपतका आधारमा प्रति युनिट तीन रुपैयाँदेखि १३ रुपैयाँसम्म महसुल लिन्छ । तर, कतिपय घरबेटीहरुले भाडावालासँग २० रुपैयाँसम्म असुल्ने गरेको उजुरी आएको प्राधिकरणले जनाएको छ ।