काठमाडौं । भारतीय सिमानामा तारवारसहित नेपाली सेना तैनाथ हुनुपर्ने दावाव बढेको छ । सत्तारूढ दल नेपाल कम्युनिष्ट पार्टीकी सांसद पम्फा भुसालले नेपाल–भारत सिमानामा तारबार र पर्खाल लगाउनुपर्ने माग गरिन् । संघीय संसद राज्य व्यवस्था तथा सुशासन समितिको बैठकमा बोल्दै उनले कुनै मुलुकले अर्को मुलुकमाथि हस्तक्षेप गर्न नहुने भन्दै भारतसँगको सीमामा तारबारको जरुरी रहेको बताएकी हुन्। ‘कुनै मुलुकमाथि अर्को मुलुकलले हस्तक्षेप गर्नुहन्न। हाम्रो भूगोल रक्षाका लागि भारतसँग जोडिएको सिमानामा तारबार र पर्खाल लगाएर नियमन गरौँ’, उनले भनिन्, ‘आफ्नो भूगोल बचाउन यो काम गर्नैपर्छ। तारबार लगाएपछि सीमानामा निश्चित नाका बनाउनुपर्छ। ती नाकाबाट परिचयपत्र या अन्य कुनै आधिकारिक कागजपत्रबाट आवतजावत गर्न दिनुपर्छ।’ भुसालले हरेक हप्ता, महिना, वर्ष मिटरदेखि किलोमिटरका दरले भारतले नेपालको भूगोल मिचिरहहेको स्मरण गराइन्। ‘त्यो भारतीय जनताले गरेको होइन। किसानले गरेको होइन’, उनले भनिन्, ‘भारतीय सीमा सुरक्षा बलले हतियारका आडमा गरेको हो। अस्त्र शस्त्रका बलमा गरेको हो।’