काठमाण्डौं ।

जर्नेलहरुको शैक्षिक योग्यताको प्रमाणपत्र नक्कली देखिएको छ । सेनामा शैक्षिक प्रमाणपत्रको झन्झटमा परेका जर्नेल हुन्, ताराध्वज पाण्डे र अशोक सिग्देल ।

उनीहरुको स्कुलको पुरानो रजिस्टरसमेत फोटोकपी गरेर रक्षा मन्त्रालयमा उजुर हालिएको छ । फुली थप्ने मुखमा यस्तो भाउँतो आइलागेपछि रक्षाले उनीहरुको बढुवा प्रस्ताव मन्त्रिपरिषद्मा लगेको छैन । ताराध्वज माघमै दुईतारे जर्नेल भएका हुन् ।

उनलाई छानबिनको सिलसिलामा हेटौंडा, सुपारेटारस्थित मध्यपृतनाबाट शुक्रबार काठमाडौं झिकाइएको छ । ताराध्वज र अशोक २०२१ सालमा जन्मिएका हुन् । तर, दुबैले सैनिक अभिलेखमा २०२३ सालको कागजात पेश गरेका छन् ।

शैक्षिक प्रमाणपत्र र नागरिकतामा जन्म मिति एउटै छैन । यसरी एक हप्ताअघि नै सेनाको आन्तरिक बोर्डले निर्णय गरेर बढुवा सिफारिस पठाउने भनिएकोमा रक्षाले रोक्दा सातदिने सूचना निस्किन पाएन ।

यसले गर्दा ब्रिगेडियर हुने अरुको पनि बाटो छेकिएको छ । त्यसरी छेकिनेमा बेलायतस्थित सैनिक सहचारी कुमारबाबु थापा, ढाकाका विनोद खरेल, अमेरिकाबाट भर्खर कोर्ष सकेर फर्किएका अनुपजंग थापा र प्रकाश देउजासहित पाँच जना छन् ।

अहिलेका अपरेशन चिफ प्रभुराम शर्माको म्याद थपिएन भने उनको पनि चिफ हुने लाइन समाप्त हुँदै छ । अशोक रोकिँदा बढुवा हुने पालो निर्मल थापाको आउँछ ।

कथंकदाचित निर्मलमा पनि कैफियत भेटिएमा नसोचिएका २६ बेसिकका विनयविक्रम राणाले पालो फुत्काउन बेर छैन ।