काठामडौं ।

नेपाल प्रहरीका अलावा नेपाली सेनाको समेत सुरक्षा पहरा रहेको ठाउँ बाट बहुमुल्य सामान चोरी भएको छ । सबैभन्दा बलियो सुरक्षा रहेकै सिंहदरबारबाट बहुमूल्य वस्तु चोरी भएको पाइएको छ । रक्षा मन्त्रालयको पुरानो भवनमा रहेको बेलायती बैठक कक्षबाट गैंडाका खाग, बाघका दारा, जरायोका सिङ लगायत वहुमूल्य वस्तु नै गायब पारिएको खुलासा भएको छ ।

राष्ट्रिय सभाको प्रत्यायोजित व्यवस्थापन तथा सरकारी आश्वासन समितिका सभापति लगायतको टोली ऐतिहासिक दस्तावेज खोज्ने क्रममा प्रधानमन्त्री कार्यालयसँगै रहेको पुरानो रक्षा मन्त्रालयको बेलायती बैठक कक्षमा पुग्यो । टोलीले बैठक कक्षको अवलोकनका क्रममा वन्यजन्तुका बहुमुल्य अंग र सरसामान गायब भएको फेला पार्यो । सिंहदरबारभित्र रक्षा मन्त्रालयको पुरानो भवनमा रहेको बेलायती बैठक कक्षमा तत्कालीन राजाहरूले विदेशी विशिष्ट व्यक्तिसँग भेटघाट गर्नुका साथै रात्रिभोज गर्थे । बैठक कक्ष गैंडाका खागदेखि बाघका दारा, जुँगा र नङ्ग्रा, जरायोका सिङ लगायत वन्यजन्तुका वहूमूल्य वस्तुबाट सुसज्जित थिए । तर ती वहुमूल्य वस्तु अहिले बैठक कक्षमा छैनन् । गैंडाका २ वटा खाग, बाघका २ वटा नङ्ग्रा, दारा र जुँगा, जरायोको सिङ र अरु जनावरका अंगसमेत कडा पहरा भएको सिंह दरबारबाटै चोरी भएका छन् । कतिसम्म भने बहुमूल्य अंग निकालेर वन्यजन्तुका काम नलाग्ने भाग मात्र बैठक कक्षमा छाडेको पाइएको छ । प्रधानमन्त्री कार्यालयको छेउमै रहेको बेलायती बैठक कक्षबाट यति ठूलो चोरी हुँदासमेत कसैले थाहा पाएनन ।