काठमाडौं ।

मेलम्ची खानेपानी आयोजनाको निर्माण कम्पनी सीएमसीले पैसा नदिएको भन्दै सप्लायर्स र मजदुर आन्दोलमा होमिएका छन् । उनीहरुलाई स्थानीय जनप्रनिधिले पनि साथ दिएका छन् । मजदुर र सप्लायर्सले डेढ अर्बभन्दा बढी रकम भुक्तानी पाएका छैनन् । पीडितले बाँकी रकम भुक्तानी नहँुदासम्म काम सुरु गर्न नदिने चेतावनी दिएर आन्दोलनको तयारी गरेका हुन् ।
सहायक निर्माण कम्पनी, सप्लायर्स र कामदारको बाँकी रकम दिनुपर्ने निकायलेनै ठेक्का तोडेर भागेपछि उनीहरु अलपत्र वनेका छन् । उनीहरुले आयोजनाको पैसा नभई ठेकेदार कम्पनीको जफत गरेको पैसा सरकारले आफूहरूलाई दिलाई दिनुपर्ने माग गरेका छन् ।

निर्माण कम्पनीले काम छाडेपछि मेलम्ची खानेपानी विकास समितिले कम्पनीबाट झन्डै चार अर्ब रुपियाँ जफत गरेको छ । दुई अर्ब दस करोड रुपियाँ धरौटी जफत भएको छ । एक अर्ब रुपियाँ डिस्प्युट बोर्डले काम गरेबापतको कम्पनीलाई भुक्तानी दिनु भनी निर्णय गरिसकेको रकम बाँकी छ । कम्पनीको उपकरण र स्टक म्याटिरियल झन्डै एक अर्ब रुपियाँको छ ।
मेलम्ची खानेपानी सिएमसी अवरोध अध्ययन तथा सहजीकरण समितिका संयोजक कृष्ण गोपाल तामाङका अनुसार सीएमसीले स्थानीय सप्लायर्सको करिब २० करोड, सात सय कामदारको ज्याला, दस करोड, नेपालका सहायक कन्ट्राक्टर्स र सप्लायर्सहरूको डेढ अर्ब रुपियाँ भुक्तानी गर्न बाँकी देखिएको छ ।
सीएमसीको जफत गरिएको रकमबाट स्थानीय निर्माण कम्पनी तथा मजदुरहरूलाई भुक्तानी दिइयो भने कम्पनीले मुद्दा जितेको बखत पनि सो पैसा कटाएर दिन मिल्छ । तर, कम्पनीले मुद्दा जित्यो भने सरकारले जफत गरेको पैसा पनि फिर्ता दिनुपर्छ व्यवसायीको पाउनुपर्ने रकम पनि गुम्छ । सीएमसीका इटालियन प्रतिनिधिहरूले खानाखाजाबापतको र मोबाइल रिजार्चकार्डको रकमसमेत क्यान्टिनमा भुक्तानी गरेका छैनन् ।
आयोजनास्थलका स्थानीय मजदुरहरूको तीन महिनाको तलब र सञ्चयकोषबापतको नौ करोड ७४ लाख रुपियाँ कम्पनीले भुक्तानी गर्न बाँकी छ ।
अहिलेको अवस्थामा समस्या समाधान नगरी काम गर्नसक्ने अवस्था नरहने जिल्ला समन्वय समिति सिन्धुपाल्चोकका प्रमुख कृष्णगोपाल तामाङ बताउँछन् ।
कम्पनीले काम नगरेको खण्डमा निर्माण स्थलमा भएका कम्पनीका गाडी, मेसिनलगायतका औजारहरूबाट भए पनि मजदुरको तलब उठाइदिने योजनामा आफूहरु लागेको तामाङले बताए ।
मजदुर र सप्लायर्सको पैसा नदिए काठमाडौं पानी जान दिन्नौं- कृष्णगोपाल तामाङ

पीडितहरुको समस्या समाधानका लागि सहजीकरण गर्न एउटा समिति गठन गरिएको छ । त्यसको नेतृत्व जिल्ला समन्वय समितिका सभापति कृष्णगोपाल तामाङले गरेका छन् । यहाँका मजदुर र सप्लायर्सको पैसा नदिए रगत बग्न सक्ने चेतावनी तामाङले दिए ।
मेलम्ची खानेपानी सिएमसी अवरोध अध्ययन तथा सहजीकरण समितिका संयोजक तामाङ मजदूर र सप्लायर्सहरुको पैसा नदिए आठ सय भन्दा धेरै मजदुर र सप्लायर्स आयोजनास्थलमा नै आमरण अनशनमा बस्ने बताउँछन् ।
‘मजदुरको पैसा नदिए काठमाडौं जाने पानीमा जनताको रगत मिसिन सक्छ । यसको मूल्य कसैले पनि चुकाउन गाह्रो हुन्छ बेलैमा बिचार पु¥याऔं ।’–तामाङले कडा रुपमा चेतावनी दिए । उनी थप्छन्,–‘सिन्धुपाल्चोकका जनता रोएर काठमाडौंको जनता हाँस्नु पर्छ भन्ने छैन । पानी पठाएर हामी समस्यामा पर्ने तर, यहाँका मजदुर र सप्लायर्सको मन रुवाएर अरुको मन हास्नु राम्रो पटक्कै होईन ।’