बुटवल । प्रदेश नम्बर पाँचका उत्कृष्ट ३२ शिक्षक सम्मानीत भएका छन् ।
प्रदेश पाँचका सामाजिक विकासमन्त्री सुदर्शन बरालले जनही नगद १५ हजारसहित सम्मान गरेका छन् ।
सामाजिक विकास मन्त्रालयका शाखा अधिकृत हरिप्रसाद अर्यालका अनुसार प्रदेश पाँचका बाह्र जिल्लामा विभिन्न विषयमा अध्यापन गराउने शिक्षकहरुलाई उत्कृष्ट सिकाई, न्यूनतम क्षमाता, बाल मनोविज्ञान, विषयवस्तु र विधि सम्बन्धी ज्ञान हासिल गरेका आधारमा शिक्षकहरुलाई सम्मान गरिएको हो ।
कार्यक्रममा मन्त्री बरालले शिक्षकहरुलाई आफ्नो विषयवस्तुमा अझ बढी रुची र जागरुकता पैदा होस् भन्ने उद्देश्यका लागि पुरस्कृत र सम्मान गरेको बताए । पहाडी जिल्लाका विभिन्न ठाउँमा पर्याप्त साधन श्रोतको अभावमा पनि मिहिनेतका साथ पढाएर जुन परिणाम दिएकोमा खुशी ब्यक्त गरे ।
कार्यक्रममा मन्त्रालयका सचिव कृष्ण ज्ञवाली र उप–सचिव थानेश्वर ज्ञवालीले पनि शिक्षकहरुलाई स्तरीय काम गर्न आग्रह गरेका थिए ।
कार्यक्रममा सम्मानित जनता उच्च मावि प्यूठानका बिज्ञान शिक्षक केशबराज पण्डितले मन्त्रालयले सम्मान गरेको उत्साहित भएको बताए ।
तीनै तहका सरकारबाट यस्ता कार्यक्रमलाई निरन्तरता दिन सके समाजमा सामुदायिक बिद्यालयलाई हेर्ने दृष्टिकोणमा परिवर्तन आउने उनको धारणा छ ।

-ऋषि भट्टराई