काठमाडौं ।

विभिन्न ३० मुलुकमा नेपालका राजदूतावास छन् । तीन देशमा पाँचवटा महावाणिज्यदूतावास छन् । त्यहाँ राजदूत र महावाणिज्यदूतका अलावा कर्मचारी संयन्त्र पनि छ । त्यतिले नपुगेर सरकारले ७१ जनालाई अवैतानिक महावाणिज्य तथा वाणिज्य दूत नियुक्त गरेको छ । तर, उनीहरुको काम खास्सै प्रभावकारी भएको देखिँदैन ।
विदेशी लगानी भित्र्याउन, पर्यटन प्रवर्द्धन र व्यापार सहजीकरण मुख्य उद्देष्य राखेर उनीहरुलाई नियुक्ति दिईएको हो ।

धेरै देशको अवस्था हेर्दा मुलुकको हितभन्दा राजनीतिक दल र नेतासँग नजिकिने माध्यममा मात्र यी पद बनेका छन् । अवैतनिक दूतको भूमिका प्रभावकारी नभएको भन्दै आलोचना भइरहेका बेला सरकारले पहिलोपटक काठमाडौंमा अवैतनिक दूत सम्मेलन गरेको छ । पूर्वाधार विकासका लागि लगानी जुटाउने भूमिकाका लागि सरकारले उनीहरुसँग आग्रह गरेको छ । स्वदेशी लगानी पर्याप्त नभएकाले विदेशी लगानी भित्र्याउनुको विकल्प छैन । यस्तो अवस्थामा सरकारले अवैतनिक दूतलाई सक्रिय बनाउन सके केही भए पनि सकारात्मक नतिजा हासिल हुन सक्छ ।