काठमाडौं ।

कार्वाहीको चेतावनीसहित सर्वोच्च अदालतले दिएको आदेशपछि अख्तियार सचिव महेश्वर न्यौपानेले समिति नै गठन गरेर भ्रष्टाचार मुद्धाको फाईल खोजेका थिए । तर, सो फाईल नभेटिएको लिखित जवाफ सर्वोच्च अदालतमा बुझाएका छन् ।
पद र शक्तिको दुरूपयोग गरी भ्रष्टाचार गरेको अभियोग लागेका पूर्वमन्त्री गोविन्दराज जोशी विशेष अदालतबाट दोषी ठहर भइसकेका छन् र त्यसविरूद्ध उनैले गरेको पुनरावेदन सर्वोच्चमा ६ वर्षदेखि विचाराधीन छ। विशेषबाट सुरुमा सफाइ पाउँदा, विशेषको पहिलो फैसला त्रुटिपूर्णभन्दै फेरि तथ्य केलाएर हेर्न सर्वोच्चले फैसला गर्दा र विशेषले पछि भष्टाचारी ठहर गर्दासम्म नखोजिएको फाइल एकएक सर्वोच्चमा खोजिनु र उता फाइल हराउनु संयोग मात्रै मान्न सकिने अवस्था छैन ।
सर्वोच्चले त्यो फाइल दिन २०७१ मै आदेश गरे पनि अख्तियारले त्यतिखेर नदिनु र अहिले खोज्दा पनि नभेटिनु रहस्यपूर्ण भएको जानकारहरु बताउँछन् ।
विशेष अदालतले भष्टाचारी ठहर गरेपछि सर्वोच्च पुगेका जोशीको मु्द्दा ४० पटकभन्दा बढी स्थगित भइसकेको छ भने अख्तियारबाट फाइल कसरी गायब भयो भनेर खोजबिन गरी दोषीलाई कारबाही गर्नतिर कसैले ध्यान दिएको छैन ।