काठमाडौं ।
हालसम्म नेपाली सेनाले २७ वटा सडक र ३० वटा पुल निर्माण गरेको उपप्रधानमन्त्री ईश्वर पोखरेलले जानकारी गराएका छन् । हाल नेपाली सेनाले काठमाडौं तराई द्रुतमार्ग, कर्णाली करिडोर, जाजरकोट –डोल्पा सडक, कालीगण्डकी करिडोर र बेनिघाट आरुघाट लार्के भञ्ज्याङ सडक निर्माण गरिरहेको छ ।

रक्षामन्त्री पोखरेलले नेपाली सेनालाई संविधानअनुसार नै विकास निर्माणको काममा लगाएको सांसदहरुलाई जवाफ दिए ।

रक्षा मन्त्रालयको बजेटमाथि सांसदहरुले उठाएका प्रश्नको मंगलबार संसदमा जवाफ दिँदै उपप्रधानमन्त्री पोखरेलले संविधानले नै सेनालाई कानून बमोजिम विकास निर्माण र विपद व्यवस्थापनमा लगाउन सकिने उल्लेख भएको बताए ।

सेनालाई विकास निर्माणको काममा लगाउँदा पेशागत दक्षतामा असर नपर्ने पनि उनले बताए । पेशागत दक्षतामा नकारात्मक प्रभाव नपर्ने गरी नेपाली सेनालाई कहाँ कस्ता कति विकास निर्माणमा लगाउने भन्ने कुरा सो सम्बन्धी ऐन वन कार्यविधि बनाई व्यवस्थित बनाइएको उनले बताए ।

सेनाको कामले राष्ट्र विकासका लागि पेशागत दक्षता र क्षमता अभिवृद्धि गर्नमा मद्धत पुगेको पोखरेलको तर्क छ ।