काठमाडौं ।

रोजगारीको खोजीमा रहेका युवतीलाई मानव तस्करले वैदेशिक रोजगारीदेखि पीआर दिलाउने नाममा बेचबिखन गर्दै आएका छन् । तस्करले नेपालबाट भारत लैजान औषधीको प्रयोगदेखि नक्कली विवाह, आफन्त भेट्ने, जागिर लगायतको बहाना गरेर सीमा कटाएका छन् । यसरी भारतको बाटो भएर लगिएकामध्ये कतिपय बाटैमा ज्यानकै जोखिम समेत बेहोरेका छन् । युवतीलाई फकाउन नक्कली विवाहदेखि औषधि प्रयोग समेत गरिएको छ । तस्करले अवैध तरिकाले प्रतिबन्धित मुलुकमा पठाएका युवतीमध्ये ४७ प्रतिशतसम्मलाई यौन व्यवसायमा संलग्न गराएको पाइएको छ । बेरोजगारीको फाइदा उठाउँदै तस्करले विदेशमा राम्रो कमाइ हुने प्रलोभन दिएर जालमा पार्छन् । यही कारण बेचबिखन रोक्नु चुनौतीपूर्ण भएको प्रहरीको भनाइ छ ।

सरकारले नेपाली महिलालाइ खाडी मुलुकमा घरेलु कामदारका रुपमा काम गर्न जाने अनुमति दिएको छैन । यस्तै इराकमा जान पनि प्रतिबन्ध छ । तर मानव तस्करले लोभ लालच देखाएर युवायुवतीलाई भारतको बाटो हुँदै ती देशमा लैजाने क्रम रोकिएको छैन । अवैध तरिकाले वैदेशिक रोजगारीमा पठाउन खोजिएकालाई प्रहरीले उद्दार गरेको विवरणका आधारमा हेर्दा पछिल्लो एक वर्षमा बेचबिखन करिब दोब्बर बढेको देखिन्छ । गत आर्थिक वर्ष ५ सय ४६ जनालाई उद्दार गरिएकामा यो संख्या अघिल्लो वर्ष ३ सय ११ थियो ।