काठमाडौं ।

पाँचथरको मिक्लाजुङ गाउँपालिका–३, आरुबोटेका बमबहादुर फियाक र उनका ज्वाइँ धनराज शेर्मासहित नौ जनाको हत्याराको पत्तो लागेको छैन । घर नजिक एक जना युवकाको लाश रुखमा झुण्डिएको अवस्थामा फेला परेको छ । आक्रमणबाट भोगर बाँच्न सफल भएकी १२ वर्षीया बालिका सीता खुजुमले हतियारधारी समूहले मकुन्डो लगाएर आएर हत्या गरेको बयान दिएको प्रहरीले जनाएको छ ।

सीताको दायाँ हात भाँच्चिएको र उनलाई थप उपचारका लागि फिदिम पुर्याइएको छ ।प्रहरीका अनुसार हत्याको कारण खुल्न सकेको छैन । हत्या हुनेमा ३६ वर्षीया जस्मिता फियाक, ४१ वर्षीय धनराज शेर्मा, २६ वर्षीया मनकुमारी फियाक, ६ वर्षीया इक्सा शेर्मा, १३ वर्षीया योवना शेर्मा, आठ वर्षीया मुना शेर्मा, ७४ वर्षीय बमबहादुर फियाक, बमबहादुरकी श्रीमती र १२ वर्षीया आशिका खजुम लिम्बू छन् । घटनाको अनुसन्धानका लागि संघीय प्रहरी इकाइ कार्यालयका एसएसपी, प्रदेश प्रहरीको विशेष टोली, केन्द्रीय अनुसन्धान व्युरो ९सिआइबी०का एसपी र तालिमप्राप्त कुकुरको टोली परिचालन गरिएको छ ।

पाँचथरको चारैतिर नाकामा चेकजाँच कडा पारिएको र तीन सय बढी प्रहरी परिचालन गरिएको छ । हत्याको पछाडि पारिवारीक कारण हुनसक्ने आशंका गरिएको छ ।