काठमाडौं ।

राष्ट्र बैंकको पछिल्लो बोर्ड बैठकबाट पारित भई अर्थ मन्त्रालय पठाउने तयारी चलिरहेको बैंकिङ कसुरसम्बन्धी विधेयक अक्षरशः पारित भएको खण्डमा बाउन्स चेक भिडाएर ठगी गर्दै आएका माफिया र ठग प्रत्यक्ष लाभान्वित हुनेछन् ।
यसअघिको बैंकिङ कसुर तथा सजायँसम्बन्धी ऐन ०६४ (पहिलो संशोधन ०७३)लाई अझै परिष्कृत गर्ने नाममा खातामा पैसा नहुँदा नहुँदै चेक काटेर अरूलाई दुःख दिने नियत भएका फटाहाहरूलाई छुट दिन खोजिएको हो । खातामा पैसा नहुँदा चेक काटेर दुःख दिएको भेटिए तत्काल कारबाही हुने व्यवस्थालाई खुकुलो बनाई १५ दिनको समय दिन लागिएको छ ।
खातामा पैसा नहुँदा नहँुदै चेक काट्नेलाई तत्कालै बैंकिङ कसुरसम्बन्धी ऐनअन्तर्गत मुद्दा चलाइँदै आएकोमा प्रस्तावित विधेयकमा १५ दिनको समय दिने र सो अवधिभित्र पनि रकम जम्मा नगरे मात्रै कारबाही प्रक्रिया अघि बढाउने व्यवस्था विधेयकमा उल्लेख भएको राष्ट्र बैंक स्रोतले जनआस्थालाई जनायो । चेक बाउन्ससम्बन्धी कसुरलाई समेत खुकुलो बनाइएको छ । यसअघि अब यस्तो केसमा १२ वर्षसम्म जेल बस्नुपर्ने व्यवस्था थियो । त्यस्ताले अब बढीमा ६ महिना जेल बसे पुग्नेछ । यसअघि १० अर्ब वा सोभन्दा बढीको चेक बाउन्समा १२ वर्षभन्दा बढी जेल बस्नुपर्ने व्यवस्था थियो । यस्तै १ अर्बसम्मको चेक बाउन्स भएको खण्डमा कम्तीमा आठदेखि बढीमा १० वर्ष जेल बस्नुपर्ने व्यवस्था थियो । ५० करोडसम्मको चेक बाउन्स भए कम्तीमा ६ देखि ८ वर्षसम्म जेल बस्नुपथ्र्याे । १० लाखसम्म चेक बाउन्स भए कम्तीमा एक वर्ष जेल जानुपथ्र्याे । संशोधित नयाँ व्यवस्थाले चेक बाउन्स प्रकरणमा बढीमा ६ महिनासम्म जेल सजायँ हुनेछ । जसअन्तर्गत ३ लाखसम्मका लागि एक महिना, १० लाखसम्मको हकमा एक महिनासम्म कैद र एक लाख जरिवाना, ५० लाख रुपैयाँसम्म भए ५ लाख रुपैयाँसम्म जरिवाना र ३ महिनासम्म कैद र सोभन्दा बढी भए बिगोको ५० प्रतिशतसम्म जरिवाना र ६ महिनासम्म कैद सजायँको प्रस्ताव गरिएको छ । आपसी कारोबार नमिल्दा खातामा रकम नै नभए पनि बैंकमा चेक साट्न लगाई त्यसैलाई प्रमाण बनाएर प्रहरीमा बैंकिङ कसुरका उजुरी आउने क्रम बढेको छ । पछिल्लो दुई वर्षमा काठमाडौं प्रहरी परिसरमा चेक बाउन्स प्रकरणमा १८ सय मुद्दा दर्ता भएको रेकर्ड छ । अघिल्लो वर्ष ४ सय २७ वटा उजुरी दर्ता भएकोमा यस वर्ष १४ सय यस्ता घटनासम्बन्धी उजुरी दर्ता भएका छन् । परिसरमा दैनिक सरदर २५ वटासम्म चेक बाउन्सका केस दर्ता हुने गरेको प्रहरीको भनाइ छ ।