काठमाडौं ।
प्रधानमन्त्री ओलीले प्रदेश सरकारले नीति तथा कार्यक्रम र बजेट बनाउदा प्रचारमुखी भन्दा दीर्घकालिन योजनाहरुलाई प्रथामिकतामा राख्न निर्देश गरेका छन् । अन्तर प्रदेश परिषदको तेस्रो बैठकमा सहभागीलाई सम्वोधन गर्दै ओलीले दीर्घकालिन विकासका योजनामा जोड दिए । बैठकमा सातवटै प्रदेशका प्रमुख,जिल्ला समन्वय समिती,नगरपालिका संघ र गाउँपालिका महासंघका प्रतिनिधिहरुले आगामी बर्षको नीति तथा कार्यक्रम र बजेटका बिषयमा आफ्नो राय राखेका थिए ।
ओलीले तीनै तहका सरकारले विकासलाई समन्वय गरेर अघि बढाउनु पर्ने बताए ।
प्रधानमन्त्री ओलीले एउटै योजनामा तानातान गर्ने भन्दा पनि तीनै तहका सरकारले समन्वय र योजना नदोहोरिने गरी बजेटमा समावेश गर्नुपर्ने बताए ।
विकासका काममा पक्ष विपक्षमा बिभाजित हुनु नहुने प्रधानमन्त्री ओलीको भनाइ छ । प्रधानमन्त्री ओलीले नेपालमा संघीयताको अभ्यास नयाँ भएकोले यसमा अभ्यस्त हुने क्रममा कही कतै समस्या देखिएका कुरालाई अन्यथा लिनु नहुने बताए ।

योजना र बजेट जनसंख्याका आधारमा मात्र वितरण गर्ने हो भने दुर्गम क्षेत्रको विकास हुन नसक्ने प्रधानमन्त्रीको भनाइ छ । विकट भौगोलिक क्षेत्रमा बस्ती पनि पातलो हुन्छ विकासको खर्च पनि महंगो हुन्छ । त्यसकारण एउटा मात्र आधारमा बजेट विनियोजन गर्ने हो भने त्यस्ता ठाउँका जनताले विकासको अनुभूित गर्न पाउँदैनन् ।
प्रधानमन्त्री ओलीले विकासको बाधकका रुपमा रहेका दुर्गम बस्तीहरुलाई एकीकृत गरिने योजना सुनाए । स्थानीय,प्रदेश र संघीय सरकारले संयुक्त रुपमा यस्ता बस्ती पहिचान गरेर एकीकृत गर्नु पर्ने मा जोड दिए ।