काठमाडौ ।

प्रधानमन्त्री केपी शर्मा ओलीले प्राडा देवनारायण साहलाई चिकित्सा विज्ञान राष्ट्रिय प्रतिष्ठान (न्याम्स) को उपकुलपति नियुक्त गरेका छन्। उपप्रधानमन्त्री तथा स्वास्थ्यमन्त्री एवं न्याम्सका सहकुलपति उपेन्द्र यादवको सिफारिसमा प्रधानमन्त्री ओलीले साहलाई उपकुलपति नियुक्त गरेका हुन्। यस्तै न्याम्सका अन्य पदाधिकारी पनि नियुक्त भएका छन्। पर्साका प्राडा सुबोधकुमार अधिकारी शिक्षाध्यक्ष, पाँचथरकी प्रा प्रमिला देवान रजिस्ट्रार, सुनसरीका प्राडा पियूष दाहाल डिन र सप्तरीका डा केदारप्रसाद सेञ्चुरी वीर अस्पतालको निर्देशकमा नियुक्त भएका छन्। उनीहरूको पदावधि चार वर्षको हुनेछ। प्रधानमन्त्री ओलीको उपस्थितिमा स्वास्थ्यमन्त्री यादवले उपकुलपति साहलगायत पदाधिकारीलाई शुक्रबार बालुवाटारमा पद तथा गोपनीयताको सपथ गराए। शपथपछि प्रधानमन्त्री ओलीले भक्तपुरमा वीर अस्पताल निर्माण गर्ने कार्य तत्काल अघि बढाउन निर्देशन दिए।