काठमाडौं ।

भन्सार विभागले आफ्ना कर्मचारीहरुमाथि निगरानी गर्न अनुसन्धान शाखा स्थापना गरेको छ।भन्सार छलीमा सघाउने कर्मचारीहरुविरुद्ध मुद्दा दायर हुन थालेपछि सो शाखा स्थापना गरिएको हो। विभागले राजश्व चुहावट नियन्त्रण ऐनअनुसार कारबाही गर्न थालेपछि कर्मचारीहरुलाई समेत प्रतिवादी बनाउन थालिएको हो। ऐनमा कर्मचारीको मिलेमतो देखिएकोमा उनीहरुविरुद्ध समेत मुद्दा चलाउन सकिने प्रावधान छ।

जसले मातहतका कर्मचारीहरुको निगरानी गर्नुका साथै उजुरी उपर समेत अनुसन्धान गर्ने छ। भन्सार छलीलाई नियन्त्रण गर्न सो शाखा स्थापना गरिएको विभागले जनाएको छ।

दुई साताअघि मात्र राजश्व अनुसन्धान विभागले नेपालगञ्ज भन्सार कार्यालयका सात कर्मचारीविरुद्ध राजश्व चुहावटको मुद्दा दायर गरेको थियो। नक्कली प्रज्ञापनपत्रका आधारमा सामान आयात गर्ने गिरोहसँग मिलेमतो देखिएपछि विभागले मुद्दा दायर गरेको हो।

हाल रसुवा तथा वीरगंज भन्सार कार्यालयका कर्मचारीमाथि समेत विभागले अनुसन्धान गरीरहेको छ।