-
काठमाडौं ।
मंगलबारको बैठकमा केन्द्रीय सदस्य गगन थापाले छ भाइको तर्फवाट ५० पन्ने दस्तावेज पेश गरेका छन् । नियमित प्रक्रियाबाट छिटोमा दुई वर्षमा मात्र महाधिवेशन हुन सक्ने र यसले पार्टीलाई थप क्षति हुने भन्दै दस्तावेजमा भनिएको छ, ‘महासमिति बैठकबाटै संशोधित विधान परित गरी शीघ्र महाधिवेशनमा जानुपर्छ ।’गगनसहित धनराज गुरुग,गुरु घिमिरे,प्रदीप पौडेल,चन्द्र भण्डारी र बद्री पाण्डे रहेका छन् ।
पार्टीको नेतृत्व एजेण्डाका आधारमा चयन हुने भएपनि उमेर केही होइन भन्न नसकिने भन्दै ‘छ भाइ’ले सबै किसिमका अतिवादसँगको असंख्य संघर्षले थाकेको नेतृत्वलाई सत्ताको शितल छहारीले शिथिल र यथास्थितिवादी बनाएको बताएका छन् । पुराना मान्छेको स्वभाविक बहिर्गमन र नयाँको आगमन नहुँदा एजेण्डा, विचार र क्षमताको दृष्टिले पार्टी जमेको पोखरी जस्तो भएको भन्दै दस्तावेजमा भनिएको छ ।
अहिलेकै नेतृत्वलाई निरन्तरता दिनु जनादेश र मतादेशलाई नबुझ्नु भएको उनीहरुको निष्कर्ष छ ।
उनीहरुले पार्टी सभापति शेरबहादुर देउवालाई महासमिति र शीघ्र महाधिवेशन गराएर सहजतापूर्वक नेतृत्व हस्तान्तरण गर्नेतिर लाग्न पनि आग्रह गरेका छन् ।
