काठमाडौं । ३३ किलो सुन बोकेका एक ब्यक्तिको मृत्युपछि सुन तस्करीमा थप रहस्य खुल्दै गएको छ । आफ्नो चेन अफ कमाण्ड मिचेर विराटनगर र धरानसम्म पुगेर अनुसन्धान गर्ने प्रहरीदेखि कर्मचारी तथा ब्यपारी शंकाको घेरामा परेका छन् । महानगरीय अपराध महाशाखा प्रमुख एसएसपी दिवेश लोहनी, नायब उपरीक्षक प्रजित केसी र नायब निरीक्षक बालकृष्ण सञ्जेललाई शंको घेरामा राखेर प्रहरी प्रधान कार्यालयमा तानिएको छ ।

जिल्ला प्रहरी कार्यालय मोरङ स्रोतका अनुसार ३३ किलो सुन तस्करीमा संलग्न रहेको आरोपमा चेतन भण्डारीसहित मोहन अग्रवाल, रमेश उप्रेती, नर्वदा खरेल उप्रेती, रक्षा भण्डारी, प्रयास पराजुली, रोहित आचार्य, कृष्ण बस्नेत, मोहमद उस्ताम मिया, भविन राई, कमल कार्की, सन्दीप खड्का, सुनिल अग्रवाल, प्रमोद श्रेष्ठ, डोलेन्द्रप्रसाद खरेल, दावा शेर्पा, भोजराज भण्डारी, दुर्गा खरेल (उप्रेती ), भीमकुमारी खरेल, सुरेन्द्र गौतम लगायतको बैंक खाता तथा सम्पत्ति रोक्का राखेको छ । पुरानो सुन प्रकरणमा प्रहरीका केही पूर्व अधिकृत, भन्सारका अधिकारी, चर्चित व्यापारी र पूर्वमन्त्रीसम्मको मिलेमतो रहेको आशंका गरेको छ । नेपालमा सुनको कारोबार र केही वर्षअघिदेखिका घटना नजिकबाट अनुसन्धान गर्ने काम भइरहेको प्रहरी स्रोतले जानकारी दिएको छ ।