काठमाडौं ।

एमाले र माओवादी एकीकरणपछि बन्ने नेपाल कम्युनिस्ट पार्टीको विधान मस्यौता तयार भएको छ । दुई अध्यक्षले आलोपालो प्रणालीबाट एकीकृत पार्टीको नेतृत्व सम्हाल्ने गरी २ सय ९९ सदस्यीय केन्द्रीय कमिटी रहने विधान मस्यौदा तयार भएको नयाँ पत्रिका दैनिकमा खबर छ ।

१६ अध्याय र ७८ धारा रहेको विधान मस्यौदालाई तीन विषयबाहेक संगठन तथा विधान मस्यौदासम्बन्धी कार्यदलले बुधबार टुंगो लगाएको हो ।

विधान मस्यौदाको प्रस्तावनामा जनआन्दोलन र जनक्रान्तिका उपलब्धि लेखिए पनि जनयुद्ध शब्द राख्ने कि नराख्ने भन्ने विषय टुंगिएको छैन । जनक्रान्ति लेखिसकेपछि जनयुद्धको भाव समेट्ने एमालेको अडान छ भने माओवादीले जनयुद्ध शब्द नै राख्नुपर्ने तर्क गरिरहेको छ ।

समाचार अनुसार चुनाव चिह्नमा पनि विवाद छ । माओवादी नेताहरुले सूर्यभित्र हँसिया हथौडा राखेर चुनाव चिह्न मिलाउनुपर्ने अडान राखेका छन् । तर एमाले नेताहरुले भने सूर्य चिह्न मात्रै राख्नुपर्ने तर्क गरेका छन् । ०४८ देखि सूर्य चिह्न जनस्तरमा परिचित भएकाले प्रभावकारी हुने एमाले नेताहरुको भनाइ छ ।

दुई पार्टीका भागबन्डा कुन अनुपातमा गर्ने भन्ने पनि टुंगिन बाँकी छ । माओवादीले समानताको आधारमा एकीकरण हुनुपर्ने बताएको छ भने एमालेले बढीमा ६०–४० को अनुपातमा एकीकरण गर्न सकिने बताएको छ ।