काठमाडौं : सरकारले मदिरा,बियर सुर्ती र चुरोटको आयातमा लाग्दै आएको भन्सार महसुल दरमा वृद्धि गरेको छ । बिहीबार अर्थमन्त्री विष्णुप्रसाद पौडेलले आगामी आर्थिक वर्ष २०८२/८३ को बजेट सार्वजनिक गर्दै यस्तो बताएका हुन् ।

उनले मदिरा,बियर सुर्ती र चुरोटको आयातमा लाग्दै आएको भन्सार महसुल दरमा वृद्धि गरेको उल्लेख गरे । उनले भन्सार महसुलका केही दरमा समायोजन गरेको बताए । उनले भने,‘ विद्यमान अन्तःशुल्क दरमा सामान्य वृद्धि गरेको छु । स्वास्थ्य जोखिम करको दायरा विस्तार गरेको छु । विद्युतीय विजक प्रणालीमा करदाताको आबद्धता बढाउँदै केन्द्रीय विजक अनुगमन प्रणालीको दायरा फराकिलो बनाइने छ ।’

त्यसैगरी विशेष उद्योगहरूलाई कर लाभ मिल्ने भएको छ । होटल, रिसोर्ट र सूचना प्रविधिमा आधारित उद्योगहरूलाई विशेष उद्योगसरह आयकर छुट तथा विद्युत महसुलमा समेत सहुलियत दिने प्रावधान गरिएको छ।

सौर्य, वायु र ग्रीन हाइड्रोजन ऊर्जामा आधारित उपकरणको पैठारीमा १ प्रतिशत मात्र भन्सार महसुल लगाई अन्य सबै कर तथा महसुल हटाइएको छ। ग्रीन हाइड्रोजन उत्पादक उद्योगहरूलाई ५ वर्षसम्म आयकर छुट दिइनेछ।