काठमाडौ ।

सिंहदरवारमा कार्यरत सात हजार कर्मचारीलाई लक्षित गरी खोलिएको हेल्थ डेस्कबाट एक वर्षको अवधिमा दुई हजार सात सय ५० कर्मचारीले स्वास्थ्य परीक्षण गराएका छन् । ७५ जनालाई भने जटिल अवस्थाका कारण विभिन्न अस्पतालमा रेफर गरेको हेल्थ डेस्कले जनाएको छ ।

‘हेल्थ डेस्क सञ्चालनपछि नियमित रुपमा स्वास्थ्य परीक्षण गरी स्वास्थ्यको बारेमा जानकारी लिने कर्मचारीको संख्या दिन प्रतिदिन बढ्दै छ । परीक्षण गर्न आउनेमध्ये अधिकांश विरामीमा उच्च रक्तचाप, मधुमेह, ढाड दुख्ने समस्या, आँखा दुख्ने, ग्याष्ट्रिकको समस्या रहेको पाइएको छ ।

कर्मचारीहरुमा नियमित स्वास्थ्य परीक्षण नगर्ने, समयमा खानापिन नगर्ने, शारीरिक व्यायामको कमी, तनाव बढ्ने, टाउको दुख्ने समस्या पाइएको छ । कर्मचारी लामो समय एकै ठाउँमा बसेर काम गर्ने हुनाले ढाड दुख्ने समस्या पनि धेरै देखिएको छ ।