वासिङ्टन डिसी : इजरायलसँग मिलेर इरानमाथि आक्रमण सुरु गरेको १५ दिन नपुग्दै अमेरिकाले १२ अर्ब अमेरिकी डलर खर्च गरिसकेको छ। ह्वाइट हाउसका मुख्य आर्थिक सल्लाहकार केभिन ह्यासेटले फेब्रुअरी २८ देखि सुरु भएको यो सैन्य कारबाहीमा अहिलेसम्म सो परिमाणको रकम खर्च भएको पुष्टि गरेका हुन्।

मध्यपूर्वमा चर्किएको यो द्वन्द्वले अमेरिकी अर्थतन्त्रमा पार्न सक्ने असरलाई लिएर चौतर्फी चिन्ता व्यक्त भइरहेका बेला सरकारको तर्फबाट यो आधिकारिक तथ्यांक बाहिर आएको हो। सल्लाहकार ह्यासेटले ठुलो रकम खर्च भए पनि यसले अमेरिकी अर्थतन्त्रलाई खासै असर नगर्ने दाबी गरेका छन्।

अन्तर्राष्ट्रिय बजारमा इन्धनको मूल्य बढेर उपभोक्ताहरू त्रसित भइरहँदा उनले भने बजारले छिट्टै यो समस्याको समाधान खोज्ने र तेलको मूल्य घट्ने जिकिर गरे। विश्वको २० प्रतिशत तेल आपूर्ति हुने स्ट्रेट अफ होर्मुजमा इरानले अवरोध गर्ने धम्की दिएका कारण बजार अस्थिर बनेको छ। यद्यपि, सन् १९७० को दशकको तुलनामा अहिले अमेरिका आफैँ ठुलो तेल उत्पादक रहेकाले इरानी गतिविधिले अमेरिकी अर्थतन्त्रलाई धराशायी बनाउन नसक्ने ह्यासेटको तर्क छ।

युद्धको खर्च बढिरहँदा रक्षामन्त्री पिट हेगसेथले इरानमाथिको बमबारी अझै तीव्र पारिने चेतावनी दिएका छन्, जसले आगामी दिनमा सैन्य खर्च झन् बढ्ने संकेत गरेको छ। तर, ट्रम्प प्रशासनले यो युद्धको वास्तविक उद्देश्य पटक–पटक परिवर्तन गरिरहेकाले राजनीतिक वृत्तमा अन्योल छाएको छ।

सुरुमा इरानको आणविक कार्यक्रम नष्ट गर्ने भनिए पनि पछि क्षेप्यास्त्र क्षमता घटाउने र अहिले होर्मुजको सुरक्षाका लागि तेल पूर्वाधारमा आक्रमण गर्ने लक्ष्य राखिएको छ। यसै विषयलाई लिएर विपक्षी नेता चक शुमरले सरकारले युद्धको ठोस कारण दिन नसकेको र हरेक दिन फरक जवाफ दिइरहेको भन्दै आलोचना गरेका छन्।

फेब्रुअरी २८ देखि जारी यो भीषण युद्धमा अहिलेसम्म इरानमा कम्तीमा १ हजार ४ सय ४४ जनाको मृत्यु भइसकेको छ। युद्धका क्रममा १३ अमेरिकी सैनिकले ज्यान गुमाएका छन् भने १४० भन्दा बढी घाइते भएका छन्। यो लडाइँ लेबनान र खाडी मुलुकसम्म फैलिँदै गएपछि भारत जस्ता देशहरूले आफ्ना ट्याङ्करहरूको सुरक्षाका लागि वासिङ्टनलाई छोडेर सिधै तेहरानसँग वार्ता गर्न थालेका छन्।

अमेरिकाभित्रै पनि सिनेटर क्रिस भान होलेनले सरकारले नतिजाको प्रवाह नगरी पान्डोरा बक्स खोलेको भन्दै गम्भीर चिन्ता व्यक्त गरेका छन्।