काठमाडौं : क्यासिनोमा अवैध रूपमा जुवा खेलाउने भारतीय गिरोहका ६ जनालाई प्रहरीले प्रक्राउ गरेको छ । ठमेलको छाया सेन्टरमा रहेको वाल्डो क्यासिनोबाट पक्राउ परेका ६ जनालाई हिरासतमा राखेको प्रहरीले आज पत्रकार सम्मेलन गरि जानकारी गराएको हो ।

जिल्ला प्रहरी परिसर काठमाण्डौका सूचना अधिकारी एवम् प्रहरी उपरीक्षक (एसपी) पवनकुमार भट्टराईका अनुसार पक्राउ पर्नेहरूमा भारतीय क्यासिनो इभेन्ट गिरोहका नाइके सुरेश महाजनसहित प्रमोद मोरिया, दिनेश वर्मा, विक्रम सिंह, चिजा खड्का र भवानी पाण्डे रहेका छन् ।

प्रहरीका अनुसार उनीहरूले तासमा चिप जडान गर्नुका साथै आँखामा आई लेन्स लगाएर क्यासिनो खेल्नेरखेलाउने गरेको पाइएको छ । क्यासिनोमा छापा मार्ने क्रममा जुवा खेल्न प्रयोग भएका तास, सेन्सर जडित उपकरण, लेन्सलगायत सामग्री बरामद भएको एसपी भट्टराईले बताए ।

यो समूहले नेपाल, भारत, श्रीलङ्का, भियतनाम र कम्बोडिया लगायत देशहरूमा क्यासिनो इभेन्टका नाममा अवैध जुवा खेलाउँदै आएको पाइएको छ । जुवा खेलाउन मङ्सिर २५ गते ७० जना नेपाल आएका थिए भने त्यसमा सामेल हुन झन्डै दुई सय जना भारतबाट नेपाल आएको खुलेको प्रहरीले जनाएको छ ।

जुवा खेल्न आउनेहरूका लागि हवाई टिकटदेखि खाना र बसोबासको सम्पूर्ण व्यवस्था जुवा खेलाउने समूहले नै गरेको थियो । जुवामा हुन्डीमार्फत कारोबार हुने तथ्य समेत प्रहरीले फेला पारेको छ ।