काठमाडौं : चीन भ्रमणमा रहेका प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच भेट भएको छ ।

शाङ्घाई सहयोग सङ्गठन (एससीओ) को शिखर सम्मेलनमा सहभागी हुने सिलसिलामा तियान्जिनमा ओलीसँगको भेटपछि मोदीले नेपालसँग भारतको सम्बन्ध गहिरो र विशेष रहेको बताएका छन् । ‘तियान्जिनमा नेपालका प्रधानमन्त्री केपी ओलीलाई भेट्न पाउँदा खुशी लाग्यो । नेपालसँग भारतको सम्बन्ध गहिरो र विशेष छ’, उनले समाजिक सञ्जाल ‘एक्स’ मा लेखेका छन् ।

तियान्जिनमा आजदेखि शुरू हुन लागेको दुई दिने एससीओ सम्मेलनमा प्रधानमन्त्री ओली, भारतीय प्रधानमन्त्री मोदी, रुसी राष्ट्रपति भ्लादिमिर पुटिनसहित २० भन्दा धेरै देशका विश्व नेताहरू उपस्थित छन् । तर अमेरिकासँगको व्यापार युद्धले सम्मेलन ओझेलमा परेको अन्तर्राष्ट्रिय सञ्चारमाध्यमले जनाएका छन् ।

चीनका राष्ट्रपति सी जिनपिङको मैत्रीपूर्ण निमन्त्रणामा शिखर सम्मेलनमा भाग लिन नेपाली प्रतिनिधिमण्डलको नेतृत्व गर्दै प्रधानमन्त्री ओली हिजो चीन गएका थिए ।