काठमाडौं : खोटाङका तत्कालीन जिल्ला शिक्षा अधिकारी, प्रधानाध्यापक र विद्यालय व्यवस्थापन समितिका अध्यक्षसहित १३ जनाविरुद्ध भ्रष्टाचार मुद्दा दायर भएको छ ।

अख्तियार दुरुपयोग अनुसन्धान आयोगले जिल्ला शिक्षा अधिकारीहरू डा. गणेशप्रसाद भट्टराई, केशवप्रसाद दाहाल र ज्ञानमणि नेपाल तथा कार्यालयका लेखा अधिकृत भुवनप्रसाद आचार्य, लेखापाल सुरेशकुमार श्रेष्ठ, सब–इन्जिनियर शिवराज राईविरुद्ध मुद्दा दायर गरेको हो । यस्तै विद्यालय व्यवस्थापन समितिका अध्यक्षहरू पृथ्वी दाहाल र शेषकुमार पौड्याल, प्रधानाध्यापकहरू राजेन्द्रप्रसाद दाहाल, ऋषिराम पोखरेल, नयनकुमार राई, विद्यालयका लेखापाल सीता कार्की र भवन निर्माण गर्ने जिम्मेवारी पाएका अर्जुन तामाङविरुद्ध मुद्दा दायर भएको छ ।

खोटाङको हलेसी तुवाचुङ नगरपालिका–४ मा श्री लक्ष्मी माध्यमिक विद्यालयको भवन निर्माण गर्दा डीपीसी मात्र तयार गरी रकम हिनामिना गरेको अख्तियारले आज विशेष अदालतमा दायर गरेको अभियोगपत्रमा उल्लेख छ ।

विद्यालयको ४ कोठे आरसीसी भवन निर्माणका लागि ३० लाख रुपैयाँमा सम्झौता भएकोमा २ लाख ७२ हजार ३ सय २८ रुपैयाँ ६१ पैसा बराबरको मात्र काम देखिएको अख्तियारका प्रवक्त राजेन्द्रकुमार पौडेलले बताउनुभयो । उनीहरूले कानून र सम्झौता शर्त विपरीत हुँदै नभएको कामका लागि पटक पटक गरी २४ लाख रुपैयाँ भुक्तानी गरेको अख्तियारले जनाएको छ ।

अख्तियारले उनीहरूसँग फरक–फरक रकम बिगो मागदाबी गरेको छ ।