काठमाडौं : चीनले नेपालका चार वटा परियोजनामा सहयोग गर्ने सहमति भएको छ । आज उपप्रधानमन्त्री एवम् अर्थमन्त्री विष्णुप्रसाद पौडेल र चीनको अन्तर्राष्ट्रिय विकास सहायता नियोग (सिड्का) का अध्यक्ष चेन सियाओदोङ्ग नेतृत्वको प्रतिनिधिमण्डलबीच भेटवार्तापछि समझदारीमा हस्ताक्षर भएको हो ।

अर्थमन्त्री पौडेलको सचिवालयका अनुसार चितवनको भरतपुरमा रहेको बीपी कोइराला मेमोरियल क्यान्सर अस्पातालमा बोनम्यारो ट्रान्सप्लान्टेशन निर्माणसम्बन्धी परियोजना, निजामती कर्मचारी अस्पतालको विस्तार गर्न सम्भाव्यता अध्ययन गर्ने, दुई देशबीच मानव संशाधन विकाससम्बन्धी र रसुवागढी–केरुङ अन्तरदेशीय विद्युत् प्रसारणलाइन निर्माणको सम्भाव्यता अध्ययनसम्बन्धी समझदारीपत्रमा हस्ताक्षर भएको हो ।

यस्तै सिड्काका अध्यक्ष सियाओदोङ्गले रसुवामा केही समयअघि बाढीले पुर्‍याएको भौतिक संरचनाको पुनर्निर्माणका लागि सहयोग गर्ने प्रतिबद्धता व्यक्त गरेका अर्थमन्त्रीको सचिवालयले जनाएको छ ।

भेटवार्तामा सिड्काका अध्यक्ष सियाओदोङ्गले भौतिक संरचनाहरूको पुनर्निर्माणलाई आवश्यक सहयोग गर्ने र भन्सार प्रक्रिया छिटो सञ्चालन हुने गरी काम गर्ने जानकारी दिनुभएको मन्त्री पौडेलको सचिवालयले पठाएको प्रेस नोटमा उल्लेख छ ।