काठमाडौं : नेपाल र दक्षिण कोरिया सरकारले बर्दियामा समावेशी ग्रामीण विकास परियोजनाका लागि ८० लाख अमेरिकी डलर (झन्डै १ अर्ब ९ करोड रुपैयाँ) बराबरको अनुदान सम्झौतामा हस्ताक्षर गरेका छन् ।

परियोजनाले बर्दियाका ग्रामीण समुदायमा कृषि उत्पादकत्वमा वृद्धि, कृषि मूल्य शृङ्खलाको स्तरोन्नति, बजार पहुँचको विकास र पारिस्थितिक पर्यटनको विस्तारलगायत कार्य गर्नेछ । परियोजना कार्यान्वयन अवधि सन् २०२९ डिसेम्बरसम्म तोकिएको छ ।

कोरिया सरकारको तर्फबाट परियोजना कार्यान्वयन गर्ने निकाय कोरियन अन्तर्राष्ट्रिय सहयोग संस्था हुनेछ भने नेपाल सरकारको तर्फबाट सङ्घीय मामिला तथा सामान्य प्रशासन मन्त्रालय र बर्दियाका आठ वटा पालिका छन् ।

सिंहदरबारमा आज आयोजित समारोहमा नेपाल सरकारको तर्फबाट अर्थ सचिव घनश्याम उपाध्याय र कोरिया सरकारको तर्फबाट नेपालमा रहेका राजदूत पार्क ताई–यङले सम्झौतामा हस्ताक्षर गरे।