काठमाडौं । शुक्रबार नेपालमा अहिलेसम्मकै धेरै १ हजार ४ सय ५४ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयले नियमित कोभिड–१९ अपडेटका क्रममा प्रवक्ता डा. जागेश्वर गौतमले उक्त संख्यामा नयाँ संक्रमित थपिएको जानकारी दिएका छन् । उनका अनुसार यीसँगै नेपालमा कोरोना संक्रमितको कुल संख्या ५१ हजार ९ सय १९ पुगेको छ । पछिल्लो २४ घण्टाको ११ हजार १ सय ६७ वटा नामूनाको पीसीआर परीक्षण भएको थियो ।

त्यसैगरी यसै अवधिमा थप ९ सय ७२ जना कोरोनामुक्त भएर डिस्चार्ज भएसँगै अहिलेसम्म यसरी निको हुनेको संख्या ३६ हजार ६ सय ७२ पुगेको प्रवक्ता डा. गौतमले सो अवसरमा जानकारी दिएका छन् । यो निको हुने ७१ प्रतिशत हो ।

मन्त्रालयका अनुसार सक्रिय संक्रमितको संख्या १४ हजार ९ सय २१ जना पुगेको छ । तीमध्ये ६ हजार ६ सय ३४ होम आइसोलेसनमा र बाँकी ८ हजार २ सय ९१ जनाको संस्थागत आइसोलेसनमा उपचार भइरहेको छ । संक्रमितहरुमध्ये १ सय ७० जना सघन उपचार कक्षमा र २४ जनाको भने भेन्टिलेटरमा उपचार भइरहेको मन्त्रालयले बताएको छ । त्यस्तै क्वारेन्टाइनमा ६ हजार ७८ जना रहेका छन् ।

पछिल्लो २४ घण्टामा थप ५ जनाको कोरोनाबाट मृत्यु भएको मन्त्रालयले पुष्टि गरेको छ । मृतकमा १ महिलासहित ५ जना छन् । मृत्यु हुनेमा मोरङकी ४० वर्षीया महिला साथै काठमाडौंका ७० वर्षीय, महोत्तरीका ६५ वर्षीय, धनुषाका ४५ वर्षीय र नवलपरासीका ५५ वर्षीय पुरुषको कोरोनाबाट मृत्यु भएको मन्त्रालयले जानकारी दिएको छ । यसरी अहिलेसम्म नेपालमा कोरोनाकै कारण ज्यान गुमाउनेको संख्या ३२२ पुगेको छ ।