काठमाडौं । विगत २४ घन्टामा थप ९ सय २ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले बताएको छ । मन्त्रालयको नियमित कोभिड–१९ प्रेस ब्रिफिङमा प्रवक्ता डा. जागेश्वर गौतमले यस अवधिमा १० हजार ६११ वटा नमूनाको पीसीआर परीक्षण भएकोमा उक्त संख्यामा नयाँ संक्रमित थपिएको जानकारी दिएका हुन् । यीसँगै नेपालमा अहिलेसम्म संक्रमितको संख्या ४८ हजार १३८ पुगेको छ ।

२४ घन्टामा २ हजार २८७ जना कोरोनामुक्त भई डिस्चार्ज भएको प्रवक्ता गौतमले बताएका छन् । एकै दिन निको भएर जानेको संख्यामा अहिलेसम्मकै धेरै हो । यसरी नेपालमा अहिलेसम्म कोेरोनाबाट निको हुनेको संख्या ३२ हजार ९६४ पुगेको छ । यो कुल संक्रमितमध्ये निको हुने दर ६८.५ प्रतिशत हो ।

त्यसैगरी सकृय संक्रमितको संख्या १४ हजार ८६८ जना पुगेको छ । जसमध्ये संस्थागत आइसोलेसनमा ८ हजार ५३ जना रहेका छन् भने होम आइसोलेसनमा ६ हजार ८१५ रहेको मन्त्रालयले बताएको छ । त्यस्तै अहिले क्वारेन्टाइनमा बस्नेको संख्या ५ हजार ३१० जना पुगेका छन् ।

मन्त्रालयका अनुसार विगत २४ घण्टामा कोरोना संक्रमणबाट थप ६ जनाको मृत्यु भएको छ । यसरी अहिलेसम्म कोरोनाकै कारण ज्यान गुमाउनेको संख्या ३ सय ६ पुगेको मन्त्रालयको तथ्यांकमा उल्लेख गरिएको छ ।